Пантыфік прызначыў свайго новага вікарыя для Рымскай дыяцэзіі

Святы Айцец прыняў адстаўку 77-гадовага кардынала Агасціна Валіні з пасады генеральнага вікарыя для Рымскай дыяцэзіі і архіпрэзбітэра базылікі св. Яна на Латэране. Францішак прызначыў яго пераемнікам былога дапаможнага біскупа Рымскай дыяцэзіі Анджэла Дэ Данаціса, і надаў яму годнасць арцыбіскупа.

Арцыбіскуп Дэ Данаціс нарадзіўся ў 1954 г., святраскае пасвячэнне атрымаў у 1980 г. Філасофскае навучанне праходзіў ў Папскім латэранскім універсітэце, ступень ліцэнцыята па маральнай тэалогіі здабыў у Папскім грыгарыянскім універсітэце. Першапачаткова працаваў у душпастырстве, а затым быў духоўным айцом у семінарыі Рымскай дыяцэзіі. На працягу некалькіх гадоў быў пробашчам парафіі св. Марка на Капіталійскім пагорку ў цэнтры Вечнага горада, якую ператварыў ў сапраўдны цэнтр духоўнасці. З’яўляецца аўтарытэтным прапаведнікам: часта праводзіць духоўныя практыкаванні для духавенства. У 2014 г. Святы Айцец даручыў яму ўзначаліць рэкалекцыі для супрацоўнікаў Рымскай курыі. 14 верасня 2015 г. Францішак прызначыў яго дапаможным біскупам Рымскай дыяцэзіі.