Ֆրանչիսկոս Պապ. ''Սուրբ Հոգին կարող չէ մտնել փակ սրտի մը մէջ''

(Ռատիօ Վատիկան) Միայն Սուրբ Հոգին է որ մեզի կը սորվեցնէ ըսել ''Յիսուս Տէրն է''­, ասոր համար հարկաւոր է որ մեր սրտերը բանանք ունկնդրելու համար Սուրբ Հոգիին ձայնը,  որպէսզի կարողանանք վկայել Յիսուս Քրիստոսը։ Այս եղաւ Ֆրանչիսկոս Սրբազան Քահանայապետին, երկուշաբթի 22 Մայիս 2017-ին, Տոմուս Սանթա Մարթայի մատրան մէջ մատուցած Սուրբ պատարագի ընթացքին արտասանած քարոզին առանցքը։ 

''Ձեզ որբ պիտի չթողում, ձեզի պիտի ուղարկեմ փաստաբան մը` Սուրբ Հոգին, որ ձեզ պիտի պաշտպանէ Հօր առջեւ''։ Յիսուսի` վերջին ընթրիքի պահուն արտասանած այս խօսքերուն վրայ հիմնուելով է որ Նորին Սրբութիւնը ներկայացուց օրուայ խորհրդածութիւնը, շեշտը դնելով Մխիթարիչին` Սուրբ Հոգիին վրայ, որ մեզի կ՛ընկերանայ։ ''Ան արդարեւ մեզի կը սորվեցնէ ըսել` Յիսուս Տէրն է։ Առանց Սուրբ Հոգիին ոչ մէկը կարող է այս մէկը դաւանիլ։ Յիսուս ըսած է ''Սուրբ Հոգին ձեզ պիտի առաջնորդէ դէպի լիակատար ճշմարտութիւնը, Ան պիտի յիշեցնէ ամէն բաները զոր ըսի ու սորվեցուցի ձեզի''։

''Ահա այս է Յիսուսին պարգեւը շնորհուած Եկեղեցւոյ'' հաստատեց ապա Սրբազան Քահանայապետը ու հրաւէր ուղղեց լայն բանալ սրտերը Սուրբ Հոգիին դիմաց, որովհետեւ գոց սիրտ մը կարող չէ ընկալել Սուրբ Հոգին, որ պարգեւ մըն է շնորհուած Աստուծմէ''։

Ֆրանչիսկոս Պապ ապա յորդորեց աղօթել. '' Տէր բաց իմ սիրտս որպէսզի այնտեղ ներգործէ Սուրբ Հոգին ու ինծի հասկցնէ թէ Յիսուս Տէրն է'',  ապա քարոզը աւարտեց հարց ուղղելով եթէ մեզմէ ամէն մին պատրաստ է ունկնդրելու Սուրբ Հոգիին ձայնը, ու եթէ Աստուծմէ կը հայցենք շնորհքը` ունենալու բաց սիրտ մը։

''Բաց սրտով ու Սուրբ Հոգիին ունկնդրութեամբ մեք կարող ենք յառաջ ընթանալ քրիստոնէական կեանքին մէջ ու մեր կարգին վկայել Յիսուս Քրիստոսը'' ըսաւ ապա Սրբազան Պապը եզրափակելով քարոզը։