Ֆրանչիսկոս Սրբազան Քահանայապետին 19-րդ միջազգային ճամբորդութիւնը. Դէպի Ֆաթիմա։

(Ռատիօ Վատիկան) Ուրբաթ 12 եւ շաբաթ 13 Մայիս 2017-ին Ֆրանչիսկոս Սրբազան Քահանայապետը կ՛իրականացնէ քահանայապետութեան 19-րդ միջազգային առաքելական ճամբորդութիւնը որ զինք ուխտագնացութեամբ կ՛առաջնորդէ Ֆաթիմա, Ֆաթիմայի մէջ Տիրամօր երեւումներուն 100-րդ տարեդարձին առթիւ (13 Մայիս 1917)։

Ֆրանչիսկոս Պապին Ֆաթիմայի Սրբավայր սոյն ուխտագնացութիւնը կը հանդիսանայ Սուրբ Պետրոսի յաջորդներուն չորրորդը։ Առաջինը եղած է Երանելի Պօղոս Զ Պապը` 1967-ին` Տիրամօր երեւումներուն 50-րդ տարեդարձին առիթով, ապա Սուրբ Յովհաննէս Պօղոս Բ-ը` Ֆաթիման այցելած է երեք անգամ` 1982-ին, Ս. Պետրոսի մէջ իր դէմ կատարուած մահափորձէն մէկ տարի ետք, ապա 1991-ին եւ 2000-ի Յոբելենական տարւոյն առթիւ։ Պենետիկտոս ԺԶ վաստակաւոր Քահանայապետը Ֆաթիմաի սրբավայրը այցելած է 2010-ին Ճիաչինթա եւ Ֆրանչեսքօ երկու փոքրիկ Երանելիներուն երանացման 10-րդ տարեդարձին առթիւ եւ ահա Ֆրանչիսկոս Պապ` 12 եւ 13 մայիս 2017-ին Ֆաթիմա կը մեկնի որպէս ուխտաւոր եւ իր այս ուխտագնացութեան ծիրէն ներս Սուրբերու շարքին պիտի դասէ այն երկու փոքրիկ մանուկները որոնք Քոյր Լուչիայի հետ միասին ականատես եղան ` Վարդարանի Տիրամօր երեւումներուն։

Ֆրանչիսկոս Սրբազան Քահանայապետին Ֆաթիմա կատարելիք առաքելական այցելութեան նշանաբանն է ''Մարիամի հետ` յոյսի ու խաղաղութեան մէջ ուխտաւոր''։