Papa Françesku u lut në Kapelën e Dukjeve të Zojës së Fatimës - vizita e tij e parë, pas takimeve ceremoniale dhe ndalimit në kapelën e bazës ushtarake, ku zbriti me avion. Në lutjen e zjarrtë, që i drejtoi Shën Marisë, së bashku me besimtarët, ndjehej reflektimi mbi pjesën e tretë të Sekretit të Fatimës, profeci vuajtjesh për Kishën e për Papën, që Gjon Pali II e pati bërë të njohur në vitin 2000. Atëherë, shenjti i ardhshëm pati parë vetveten në ipeshkvin e veshur me të bardha, përshkruar nga motër Luçia dos Santos. Iu referua plagosjes së rëndë nga Ali Agça në atentatin e 13 majit 1981.
Sot, Papa Françesku, në të njëjtën linjë me fjalët e Benediktit XVI, i cili në vitin 2010 pati thënë: “Zhgënjehet ai që mendon se misioni profetik i Fatimës ka përfunduar”, iu lut Zojës së Fatimës, së bashku me besimtarët e mbledhur në shesh, me këto fjalë:
Ati i Shenjtë Bergoglio:
Të falemi Mbretëreshë,
o e Lumja Virgjër e Fatimës,
Zojë me Zemër të Papërlyer
Strehë e rrugë që çon te Zoti!
Shtegtar i Dritës, që vjen tek ne nga duart e tua,
falenderoj Hyjin Atë, që, në çdo kohë e në çdo vend, vepron në historinë e njeriut;
shtegtar i Paqes, që Ti e kumton në këtë vend,
i thur lavde Krishtit, paqja jonë, dhe përgjërohem që në botë të ketë pajtim ndërmjet popujve;
shtegtar i Shpresës i frymëzuar nga Shpirti Shenjt,
vij si profet e lajmëtar për t’u larë këmbët të gjithëve, në tryezën që na bashkon.
Refreni i kënduar nga besimtarët (latinisht):
Ave o clemens, ave o pia!
Salve Regina Rosarii Fatimæ.
Ave o clemens, ave o pia!
Ave o dulcis Virgo Maria.
Ati i Shenjtë:
Të Falemi, Nënë e Mëshirës,
Zojë e veshur me të bardha!
Në këtë vend, nga ku para 100 vjetëve
iu tregove të gjithëve planet e mëshirës së Zotit,
të shikoj të veshur me dritë
e, si ipeshkëv i veshur me të bardha,
kujtoj të gjithë ata që,
të veshur me bardhësinë e Pagëzimit,
duan të jetojnë në Zotin
e thonë misteret e Krishtit në Rruzare për të arritur paqen.
Refreni…
Ati i Shenjtë:
Të falemi, o jeta e ëmbëlsimi,
o shpresa jonë, të falemi
O Virgjër Shtegtare, o Mbretëreshë Universale!
Në intimitetin më të thellë të qënies,
në Zemrën tënde të Papërlyer,
shikoji gëzimet e njerëzve
përudhë drejt Atdheut Qiellor.
Në intimitetin më të thellë të qënies,
në Zemrën tënde të Papërlyer,
shikoji dhimbjet e familjes njerëzore
që gjëmon e qan në këtë shekull plot me lot.
Në intimitetin më të thellë të qënies,
në Zemrën tënde të Papërlyer,
stolisna me shkëlqimin e gurëve të çmuar të kurorës tënde
e na bëj shtegtarë, ashtu si ishe edhe Ti shtegtare.
Me buzëqeshjen tënde prej Virgjëre
Gjallëroje gëzimin e Kishës së Krishtit.
Më vështrimin tënd plot ëmbëlsi
Përforcoje shpresën e bijve të Zotit.
Me duart në lutje, që i larton drejt Zotit,
bashkoji të gjithë në një familje të vetme njerëzore.
Refreni…
Ati i Shenjtë:
O e dhimbshmja, o e buta,
o e ëmbla Virgjëra Mari,
Mbretëreshë e Rruzares së Fatimës!
Bëj ta ndjekim shembullin e të Lumëve Françesku e Gjaçinta,
e të atyre, që i kushtohen kumtimit të Ungjillit.
Do të përshkojmë kështu çdo shteg,
do të shkojmë shtegtarë përgjatë të gjitha rrugëve,
do të shembim të gjitha muret
e do të kapërcejmë çdo kufi,
duke dalë drejt çdo periferie,
duke dëshmuar drejtësinë dhe paqen e Zotit.
Me gëzimin e Ungjillit, do të jemi Kisha e veshur me të bardha,
me atë bardhësi, që është larë nga gjaku i Qengjit
derdhur edhe sot nëpër luftrat, që e shkatërrojnë botën ku jetojmë.
E kështu, do të jemi, si Ti, pasqyrë e varganit të shndritshëm
që ndriçon rrugët e botës,
duke u dëshmuar të gjithëve se Zoti ekziston,
se Zoti është,
se Zoti banon në mesin e popullit të vet,
dje, sot e në amshim.
Refreni…
Ati i Shenjtë së bashku me besimtarët:
Të falemi, o Nëna e Zotit,
o Virgjër Mari, Mbretëreshë e Rruzares së Fatimës!
Bekuar mbi të gjitha gratë,
je figurja e Kishës së veshur me dritën e Pashkëve,
je nderi i popullit tonë,
je triumfi kundër sulmit të së keqes.
O Profeci e Dashurisë së mëshirshme të Atit,
Mjeshtre e Kumtimit të Lajmit të Mirë të Birit,
Shenjë e Zjarrit përvëlues të Shpirtit Shenjt,
na mëso, në këtë shekull gëzimesh e dhimbjesh,
të vërtetat e amshuara, që Ati u zbulon të vegjëlve.
Na trego forcën e mantelit tënd mbrojtës.
Zemra jote e Papërlyer
u bëftë streha e mëkatarëve
dhe rruga, që çon deri te Zoti.
Në bashkim me vëllezërit e mi,
në Fe, në Shpresë e në Dashuri,
Ty po të besohem.
Në bashkim me vëllezërit, përmes Teje, i kushtohem Zotit,
o Virgjër e Rruzares së Fatimës.
E së fundi, i mbështjellë me Dritën, që vjen nga duart e tua,
do t’i thur lavde Zotit në shekuj të shekujve.
Amen.
Refreni…
All the contents on this site are copyrighted ©. |