Ֆրանչիսկոս Պապ ԱՄՆ-ի նախագահը պիտի ընդունի 24 Մայիսի առաւօտեան։

(Ռատիօ Վատիկան) Սուրբ Աթոռի Մամլոյ գրասենեակը հրապարակեց հաղորդագրութիւն մը որուն մէջ նշեց թէ` յառաջիկայ 24 Մայիս 2017-ի առաւօտեան 8.30-ին Ֆրանչիսկոս Սրբազան Քահանայապետը առաքելական պալատին մէջ ունկնդրութիւն պիտի շնորհէ ԱՄՆ-ի նախագահ Տիար Տոնալտ Թրամփին որ ապա հանդիպում պիտի ունենայ Սուրբ Աթոռի Պետական Քարտուղար Կարդինալ Փիեթրօ Փարոլինի ու անոր ընկերացող` Պետութիւններու հետ յարաբերութիւններու քարտուղար` գերապայծառ Փոլ Կալլակէր։ 

Այս կը հանդիսանայ առաջին հանդիպումը ընդմէջ Քահանայապետին ու ԱՄՆ-ի նախագահին որ Հռոմ ժամանելէն առաջ պիտի այցելէ Իսրայէլը ապա Սաուտական Արաբիան հուսկ պիտի մեկնի Պրիւքսէլ` 25 Մայիսին ապա կը վերադառնայ Իտալիա` Թաուրմինա, 26 մայիսին, G7-ի վեհաժողովին մասնակցելու համար։

Անցեալ 20 Յունուարին, Տոնալտ Թրամփի երդման արարողութեան առթիւ Ֆրանչիսկոս Սրբազան Քահանայապետը աղօթած էր որպէսզի անոր որոշումները առաջնորդուած ըլլան Ամերիկացի ժողովուրդին  հոգեւոր ու բարոյական հարուստ արժէքներով։։