Святы Айцец заклікаў захоўваць спадчыну Яна Паўла ІІ

Францішак узгадаў 5 красавіка 2017 г. свайго папярэдніка на Пасадзе св. Пятра. Вітаючы прысутных на агульнай аўдыенцыі ў Ватыкане пілігрымаў з Польшчы, Папа нагадаў, што 2 красавіка споўнілася 12 гадоў з дня смерці св. Яна Паўла ІІ, яго “адыходу ў дом Айца”. 

“Ён быў верным сведкам Хрыста, заўзятым абаронцам спадчыны веры. Ён нагадаў свету пра два вялікіх пасланні: Езуса Міласэрнага і Фаціму. Першае да нас наблізіў Надзвычайны Юбілей Міласэрнасці; другое, у якім гаворка пра трыумф Беззаганнага Сэрца Марыі над злом, запрашае нас усвядоміць стагоддзе аб’яўленняў Маці Божай у Фаціме. Давайце прымем гэтыя пасланні, няхай яны праймаюць нашыя сэрцы, давайце адчынім дзверы для Хрыста”, - заклікаў Пантыфік.

Трэба нагадаць, што 27 красавіка 2014 г. падчас урачыстай Эўхарыстыі на плошчы св. Пятра менавіта папа Францішак абвясціў Яна Паўла ІІ святым.