Քառասնորդացի առթիւ Չինաստանի կաթողիկէ ժողովրդապետութեան մը մէջ միջ-կրօնային հանդիպում։
(Ռատիօ Վատիկան) ֆիտես եկեղեցական լրատու գործակալութիւնը կը հաղորդէ, որ Չինաստանի Զենկ Զու թեմի, Յիսուսի Սուրբ սիրտ ժողովրդապետութեան մէջ, քառասնորդացի առթիւ կազմակերպուած միջ-կրօնային ձեռնարկի մը ընթացքին Չինացի Պուտտիսթ վանական մը, կաթողիկէ հաւատացեալներուն վկայութիւններ փոխանցած է իր հնդկաստան կատարած ուխտագնացութեան փորձառութեան մասին եւ Քալքութայի Սրբուհի Մայր Թերեզայի հանդէպ ունեցած մեծ ջերմեռանդութեան մասին։
Չինացի վանականը, հաւատացեալներուն բաշխած է Սրբուհի մայր Թերեզայի՝ Հռոմի մէջ կայացած սրբադասման արարողութեան ընթացքին օրհնուած մետալները Ան ապա մեծ յուզումով եւ հմայքով արտայայտուած է Մայր Թերեզայի մասին, որ իր ամբողջ կեանքը նուիրած էր աղքատներուն։
Վերոնշեալ ձեռնարկը մաս կը կազմէ Յիսուսի Սուրբ սիրտ ժողովրդապետութեան քառասնորդաց շրջանի ուղեւորութեան առթիւ ''կրօնական երկխօսութեան'' ի սպաս կազմակերպուած հանդիպումներուն։
Նշենք, թէ Չինաստանի Սուրբ Սիրտ Յիսուսի աշխուժ հասարակութիւնը իր գործունէութիւններու ծիրէն ներս զանազան ձեռնակներ կը կազմակերպէ երիտասարդներուն համար, անոնց հոգեւոր եւ արհեստագիտական կազմաւորման ի սպաս, կրօնուսուցումի, աւետարանումի, ընկերային սպասարկութեան ու բարեգործական աշխատանքներու միջոցաւ։ ։
Չինաստանի կաթողիկէ ժողովրդապետութիւնը, 2017 տարին հռչակած է հոգեւորականութեան տարի, հրաւիրելով բոլոր հաւատացեալները իրենց սրտերը բանալու եկեղեցւոյ դիմաց, այնպէս ինչպէս յայտնած է ժողովրդապետութեան հոգեւոր հովիւը ''մենք կ՛ուզենք ապրիլ հասարակաց ներդաշնակ կեանք մը, վերացնելով բոլոր խոչընդոտները մեր միասնական ծառայութիւնը մատուցելով հասարակութեան, Եկեղեցւոյ եւ ընկերութեան''։
| All the contents on this site are copyrighted ©. |