Selia e Shenjtë: shtetet të luftojnë kundër trafikut të njerëzve e të armëve

“Një sfidë e jashtëzakonshme, që kërkon përgjigjen e duhur”. Vëzhguesi i përhershëm i Selisë së Shenjtë, kryeipeshkvi Bernardito Auza, e ngriti dje zërin në një debat në Këshillin e Sigurimit të OKB-së, në Nju Jork, kundër trafikut të njerëzve dhe të armëve.

Këshilli i Sigurimit duhet të ketë rol më vendimtar

Imzot Auza dënoi ashpër lehtësinë me të cilën armët, edhe ato të shkatërrimit në masë, përfundojnë në duart e terroristëve, duke favorizuar e duke i zgjatur konfliktet. Ai bëri thirrje për t’i përdorur më shumë traktatet dhe ligjet, që kanë të bëjnë me luftën kundër tregtisë së armëve. “Këshilli i Sigurimit i OKB-së – kërkoi Vëzhguesi i Vatikanit – të luajë një rol më vendimtar në luftën kundër plagës së trafikut, duke parandaluar e duke u dhënë fund konflikteve të armatosura, si edhe duke favorizuar konsolidimin e paqes dhe të zhvillimit.

U kujtua tragjedia e të krishterëve, e jazidëve dhe e pakicave fetare në Irak

Imzot Auza foli më pas për “bashkësitë e krishtera, jazidët dhe pakicat etnike e fetare në zonën e Mesopotamisë së lashtë, njerëz të skllavëruar, të shitur, të vrarë dhe të poshtëruar me çdo lloj mënyre”. “Mungesa e dukshme e përpjekjeve serioze për t’ia dorëzuar drejtësisë autorët e këtyre akteve të genocidit dhe të dhunimit të të drejtave të njeriut e të së drejtës ndërkombëtare – vërejti imzot Auza – ngre shumë pikëpyetje. Sa tmerre të tjera duhen toleruar para se viktimat të ndihmohen, të mbrohen e të fitojnë drejtësinë?”.

Emigrantët pa dokumente

Duke theksuar karakterin parësor të luftës kundër trafikut, gjatë papnisë së Françeskut, Vëzhguesi i Vatikanit vuri në dukje lidhjen ndërmjet kësaj plage të shoqërisë dhe varfërisë së skajshme, zhvillimit të pakët, përjashtimit shoqëror, mungesës së arsimit dhe të punës. Trafikantët e njerëzve, terroristët, grupet e armatosura dhe rrjetet ndërkombëtare të kriminalitetit të organizuar gjejnë terren të përshtatshëm ndër njerëzit më të brishtë, në ikje nga mungesa e perspektivës, nga luftrat e nga fatkeqësitë natyrore. Brishtësi, që theksohet më shumë, kur konsiderohen kriminelë edhe emigrantët pa dokumente, që për ligjin, janë të parregullt, denoncoi së fundi, imzot Auza.