Եւրոպական Միութեան ղեկավարները խստօրէն քննադատած են Թուրքիան
Թրքական «Հիւրրիյէթ» օրաթերթը կը հաղորդէ, որ Եւրոպական խորհուրդի նախագահ Տոնալտ Թուսք յայտարարած է, որ Թուրքիոյ կողմէ Հոլանտային ուղղուած ֆաշական մեղադրանքները «կապ չունին իրականութեան հետ»:
«Ռոթերտամը, որ ամբողջովին աւերուած է նացիներուն կողմէ, այժմ ունի քաղաքապետ մը, որ ծնած է Մարոք: Եթէ մէկը Ռոթերտամի մէջ ֆաշականութիւն կը տեսնէ, ուրեմն ան բոլորովին անջատուած է իրականութենէն», Եւրոպական խորհրդարանի լիագումար նիստի ընթացքին ըսած է Թուսք:
Եւրոպական յանձնաժողովի նախագահ Ժան-Քլոտ Եունքեր իր կարգին անթոյլատրելի համարած է Թուրքիոյ կողմէ Գերմանիոյ եւ Հոլանտայի հասցէին նացիական եւ ֆաշական մեղադրանքները:
«Ոչ թէ Եւրոպական Միութիւնն է, որ կը միանայ Թուրքիոյ, այլ Թուրքիան կը միանայ Եւրոպական Միութեան», նշած է Եունքեր:
| All the contents on this site are copyrighted ©. |