Patriarkati kaldeas: thirrje për t’i rindërtuar fshatrat e krishtera në Irak

Patriarkati i Babilonisë së Kaldejve u drejtoi një thirrje dioqezave të veta dhe bashkësisë kaldease të përhapur nëpër botë, formuar nga emigratët e  larguar prej Irakut, për të ndihmuar financiarisht në rindërtimin e fshtatrave të Rrafshit të Ninives, ku banojnë të krishterët e ikur para përparimit të të ashtuquajturit Shtet Islamik. Patriarkati dhe disa dioqeza  vunë në dispozicion rreth 500 milionë dinarë irakianë - baras me 380.000 euro - për ta shpejtuar rindërtimin e banesave dhe të kishave të dëmtuara  ose të rrënuara gjatë viteve të pushtimit xhihadist, duke krijuar, kështu, mundësinë e rikthimit të të shpërngulurve, që dëshirojnë të jetojnë përsëri në vendin e tyre, në shtëpitë e tyre.

Të monitorohen shkeljet e mundshme dhe konfliktet

Në këtë thirrje, Patriarkati u kërkon të gjitha bashkësive kaldease të vijojnë ndihmesën e tyre bujare për programet e rindërtimit. E, siç njofton agjencia Fides, deklaron se është në favor të angazhimit të vëzhguesve ndërkombëtarë, të ngarkuar për të monitoruar shkeljet e mundshme dhe konfliktet nga ana e forcave të angazhuara në luftë kundër Shetit Islamik, si dhe për të parandaluar ndeshjet ndërmjet qeverisë qendrore dhe qeverisë autonome të Kurdistanit irakian në drejtim të territoreve të çliruara.