Thirrja: lutje e frymëzuar nga Liturgjia e Fjalës së Zotit, posaçërisht nga Ungjilli (Mateu 4,1-11) i së Dielës I të Kreshmëve:Tundimi
Më thirre, o Zot, i etërve të mi,
më thirre të dal nga gracka e mëkatit
e të shkel atje, ku lulëzon liria.
Nga skllavëria e lashtë
unë dal shtigjeve të tua
me gëzim e ankth ngarkuar...
Sepse liria jote është horizont pa masë,
por është dhe kryq, e kryq i rëndë
sa barra e botës
që rrotullohet prej mijëra vjetësh
pa e dijtë se ku po shkon.
E di, liria s’është veç diell
është edhe terr e tundim:
e unë luhatem
prej kulmit të botës, si shrregull
ndërmjet Fjalës sate
edhe tundimit të djallit:
e më duhet të zgjedh
mes dritës e territ:
me frikë në sy,
me mall për dritën Tënde
që lind pas kryqit,
pa përendim.
Atëhere toka edhe njeriu i saj
der’ dje të vjetër,
shndërrohen në krijesa të reja:
krijesa krejt të lira!
Pasi përshkohen nëpër lirinë
e Kryqit tënd, o Krisht!
All the contents on this site are copyrighted ©. |