ՄԱԿ-ի գլխաւոր քարտուղար Անթոնիոյ Կուտերեշ անհանգստացած Է ղարաբաղեան հակամարտութեան գօտիի իրադրութեան սրումէն, ինչպէս նաեւ յորդորած է պահպանել հրադադարը եւ անյապաղ վերսկսիլ առարկայական բանակցութիւնները:
Այդ մասին, ըստ Armenpress.am-ի, Փետրուար 27-ին լրագրողներուն յայտարարած Է գլխաւոր քարտուղարի պաշտօնական ներկայացուցիչ Սթեֆան Տիւժարիգը:
«Մենք անհանգստացած ենք Լեռնային Ղարաբաղի մէջ սահմանագիծին երկայնքով նոր բախումներու վերաբերեալ հաղորդագրութիւններէն»,- ըսած է ան, նշելով, որ ՄԱԿ-ի գլխաւոր քարտուղարը կը պաշտպանէ ԵԱՀԿ-ի Մինսկի խումբի համանախագահներուն ջանքերը, որոնք ուղղուած են «լարուածութեան վտանգաւոր մակարդակի նուազեցման եւ իրադրութեան յետագայ ընթացքի կանխման»:
Տիւժարիգի խօսքով` համաշխարհային կազմակերպութեան վարչական ղեկավարը «կը յորդորէ կողմերուն ձեռնպահ մնալ ցանկացած այնպիսի գործողութիւններէ, որոնք կրնան վնասել հրադադարին վերաբերեալ համաձայնագիրին, եւ անյապաղ վերսկսիլ ԼՂ հակամարտութեան խաղաղ կարգաւորման միտուած առարկայական բանակցութիւնները»:
All the contents on this site are copyrighted ©. |