Ֆրանչիսկոս Պապին ցաւակցական հեռագիրը Կարդինալ Տեզմոնտ Քոննելի մահուան առթիւ։

(Ռատիօ Վատիկան) Ֆրանչիսկոս Սրբազան Քահանայապետը իր ցաւակցութիւնը յայտնեց անցեալ 20էն 21 փետրուար երկարող գիշերուայ ընթացքին իր մահկանացուն կնքած Տուպլինի երբեմնի Արքեպիսկոպոս` 90 ամեայ Իռլանդացի Կարդինալ Տեզմոնտ Քոննելի հարազատներուն։

Տուպլինի ներկայ Արքեպիսկոպոսին յղած հեռագիրին մէջ Սրբազան Քահանայապետը վեր առաւ հանգուցեալ կարդինալին` քահանայական ու եպիսկոպոսական վեհանձն ծառայութեան առաքելութիւնը` ի սպաս Իռլանդայի Եկեղեցւոյ։

Կարդինալ Քոննել ծնած է 24 մարտ 1926-ին։ Քահանայ ձեռնադրուած է 1951-ին ու 21 Յունուար 1988-ին Սուրբ Յովհաննէս Պօղոս Բ.ի կողմէ նշանակուած է Տուպլինի Արքեպիսկոպոս։ Ապա 2001-ին միշտ Սուրբ Յովհաննէս Պօղոս Բ.ի օրով, ստացած է Կարդինալական տիտղոսը։