Papa: studentët, Françesku i pakundshoq, nuk na zhgënjeu

“Papa Françesku është i pakundshoq, ishim të sigurt se nuk do të na zhgënjente; e kështu edhe ndodhi!”. Një grup studentësh komentojnë, në sheshin e ateneut Roma Tre, vizitën e Françeskut, që sapo përfundoi, duke shikuar në celularët e tyre fotot, mbetur aty, si kujtim i kësaj dite të paharrueshme. E edhe të papërsëritshme, për emocionet krejt të veçanta, që shkaktoi, duke prekur mendje e zemra. E nuk janë të vetmit, që e konsiderojnë të paharrueshëm këtë takim. Kujtojnë, sidomos, se Papa iu drejtua të gjithëve, pa dallim feje, as prejardhjeje. E kështu preku drejtpërdrejt pikën më delikate: atë të unitetit. Me vlerë të dorës së parë në këtë situatë, që kalon bota e në mes të studentëve universitarë.

Erdhëm që në orën 7 - kujtojnë më tutje dy studente - që të mund ta dëgjonim nga afër e t’i shtrëngonim edhe dorën.

Emocion i pashembullt! Shesh, që tundet nga brohoritjet e studentëve: “Rroftë Papa!” e “Françesku, Françesku!”.  Brohoritje, që e pritën Papën kur hyri edhe e përcollën, kur doli. Duke lënë pas shumë fjalë, që nuk do të shlyhen kurrë nga kujtesa e studentëve.

“Eshtë vizitë historike - komenton një studente e drejtësisë - e vlerësova shumë fjalën e Papës kushtuar integrimit, në një vend si universiteti. Fjalët e tij hynë drejt e në zemra, aq më shumë sepse foli lirisht, pa tekst të përgatitur më parë. Na la pas një kujtim të paharrueshëm, me vlera të mirëfillta për të ardhmen tonë.