Լատերանեան Դաշինքին 88-րդ Տարեդարձը։ ''Վատիկանի'' Պետութեան ծնունդը։

(Ռատիօ Վատիկան) Շաբաթ 11 Փետրուարին կը յիշատակուի Լատերանեան դաշինքին 88-րդ տարեդարձը։

Լատերանեան դաշինքը Եկեղեցւոյ եւ իտալական պետութեան միջեւ փոխ յարաբերութեանց դաշինքն է, որ ստորագրուեցաւ 11 փետրուար 1929-ին, եւ որով վերջ գտաւ ''Հռոմէական հարց'' կոչուած կնճռոտ խնդիրը եւ վերջ տրուեցաւ նաեւ՝ եկեղեցւոյ ու իտալական պետութեան միջեւ 1870-էն ի վեր տիրող լարուածութեան։
 

''Իտալիոյ Պետութիւնը Սուրբ Աթոռին կը ճանչնայ անոր բացառիկ իրաւասութիւնն ու հեղինակութիւնը Վատիկանի վրայ, իր այսօրուայ կազմով...այդպէսով ծնունդ կ՛առնէ Վատիկան Քաղաք Պետութիւնը.... '' գրուած է վերոնշեալ դաշնագիրին մէջ որով  ''Վատիկանը'' ճանչցուեցաւ իբրեւ անկախ պետութիւն։

0,44 քմ քառակուսի տարածութեամբ աշխարհի այս ամենափոքր պետութեան ծնունդի փաստաթուղթը, երջանկայիշատակ Պիոս ԺԱ Քահանայապետին անունով  ստորագրեց այդ ժամանակուայ Սուրբ Աթոռի Պետական քարտուղար` Կարդինալ Փիեթրօ Գասպարինի, իսկ Իտալիոյ Թագաւորի Վիթթորիօ Էմննաուելէ Գ-ի անունով` վարչապետ Պենիթօ Մուսոլինին։

Ինչպէս բոլոր Պետութիւնները Վատիկանը  եւս ունի իր դրօշը` դեղին եւ սպիտակ գոյներով որուն վրայ պատկերացուած են խոյր և բանալիներ ունի ապա իր ''պետական'' կառոյցներն ու գրասենեակները։

Այս անկախութեամբ Սուրբ Աթոռը դարձաւ միջազգային իրաւունքի սեփականատէր ու Քաղաք Պետութիւն ստեղծումը Սուրբ Աթոռին թոյլատրեց պահպանել իր անկախութիւնը աշխարհի բոլոր իշխանութիւններէն։ Վատիկանը այդ օրէն  դարձաւ Քահանայապետի հիմնական նստավայր։