Новы дырэктар Ватыканскіх музеяў

Святы Айцец прызначыў 20 снежня 2016 г. новага дырэктара Ватыканскіх музеяў. Ім стала спадарыня Барбара Ята, былы віцэ-дырэктар гэтай установы. Яна пачне выконваць свае новыя абавязкі з 1 студзеня 2017 г., паведаміла Зала Друку Апостальскай Сталіцы.

Барбара Ята стала першай у гісторыі жанчынай прызначанай дырэктарам Ватыканскіх музеяў. Яна замяніла на гэтай пасадзе прафесара Антоніа Паолучы, які кіраваў музеямі з 2007 г.

Новапрызначаны дырэктар нарадзілася ў 1962 г. у Рыме. Вывучала філалогію, палеаграфію, архіўную справу і гісторыю мастацтваў. Стажыравалася ў Вялікабрытаніі, Партугаліі і ЗША. З 1990-х гадоў займалася выкладаннем гісторыі графікі і тэхнікі стварэння гравюр. Мае шмат навуковых публікацый.

У 1996 г. пачала працу у Ватыканскай Апостальскай Бібліятэцы. Займала пасаду кіраўніка Кабінету медных гравюр, а ў 2010 г. стала куратарам секцыі графікі Аддзелу друкаваных кніг. У чэрвені 2016 г. была пераведзена на пасаду віцэ-дырэктара Ватыканскіх музеяў.