(Ռատիօ Վատիկան) Ֆրանչիսկոս Սրբազան Քահանայապետը, Կիրակի 27 նոյեմբեր 2016-ին, ցաւակցական հեռագիր մը ուղղեց Յիսուսեան միաբանութեան ընդհանուր մեծաւոր` Հայր Արթուրօ Սոզային որուն մէջ իր ցաւակցութիւնները փոխանցեց Յիսուսեան համայն միաբանութեան ընտանիքին ի լուր Յիսուսեան Միաբանութեան երբեմնի ընդհանուր մեծաւոր` Հայր Փիթեր Հանց Քոլվընպախի մահուան։
Նորին Սրբութիւնը ցաւակցագիրին մէջ յիշեց Հայր Քոլվընպախի ամբողջական հաւատարմութիւնը Քրիստոսի ու Աւետարանին, ինչպէս նաեւ անոր վեհանձն նուիրումը ու ծառայական հոգին ի սպաս Եկեղեցւոյ բարիքին։ Սրբազան Պապը աղօթք բարձրացուց առ Աստուած հայցելով Աստուածային ողորմութիւնը ու ննջեցեալին հոգւոյն համար յաւիտենական հանգիստ, ապա վստահեցուց իր հոգեւոր մօտիկութիւնն ու մասնակցութիւնը յուղարկաւորութեան արարողութեան, ու բոլոր եղբայրակիցներուն ու բոլոր անոնց որոնք կը բաժնեկցին այս սուգի տխրութիւնը, ջամբեց իր առաքելական օրհնութիւնը։
All the contents on this site are copyrighted ©. |