''Ինչ որ Աստուած միացուց մարդ թող չբաժնէ'': Ամուսնացեալներուն նուիրուած օր:

Ինչ որ Աստուած միացուց մարդ թող չբաժնէ»: (Մարկոս 10,9) - 

Ամուսնացեալներուն նուիրուած օրուան` Հայր Գէորգ Թ Ծ Վարդապետ Զապարեանի մատուցած սուրբ Պատարագի քարոզը:

Հաւաքուած  ենք  այսօր,  Սուրբ  Պատարագով  նշելու  ամուսնութեան  կոչման գեղեցկութիւնն ու ուրախութիւնը:

Մեզի  հետ  կը  գտնուին  զանազան  տարեդարձներ  տօնող  ամոլներ,  որոնք փայլուն  հաւաստիքն  են  ամուսնական  հաւատարմութեան:  Անոնք  կը  փաստեն  մեզի, թէ  Պսակի  սուրբ  Խորհուրդին  շնորհքով,  հնարաւոր  է  ապրիլ  զիրար  ցմահ  սիրելով՝  լաւ ու  վատ ժամանակներուն, նեղութեան ու բարօրութեան ատեն:

Սիրելի  Յոբելեարներ,  դուք  մեզի  կը  հայելացնէք  հաւատարիմ,  արդիւնաւոր  եւ յաւերժական սէրը:

Կասկած  չկայ,  որ  տարիներու  ընթացքին,  դուք  բազմաթիւ  մարտահրաւէրներ դիմագրաւած ըլլալով հանդերձ չէք մոռցած, որ Աստուած ի'նքը կապած է ձեզ իրարու:

Մերօրեայ  խնդիրներէն  մէկն  է  եկեղեցական  ամուսնութիւններու  թիւին  նուազումը: Արդարեւ,  այսօր,  բազմաթիւ  երիտասարդներ  ու  երիտասարդուհիներ  կը  նախընտրեն կենակցիլ  առանց  Աստուծոյ  օրհնութիւնն  ընդունելու:  Անոնք  հարցական  կը  նկատեն հնարաւորութիւնը ցմիշտ զիրար սիրելու, ու կը վախնան վերջնական որոշում առնելու:

Սիրելի Յոբելեարներ, Դուք,  այսօր,  նշելով  ձեր  ամուսնութեան տարեդարձը,  կը  փաստէք,  թէ  անկարելի  չէ  ի  գործ դնել  Ս.  Պսակի  յանձնառութիւնները,  եւ  թէ ամուսնութեան  տեւականութիւնը  ո'չ  միայն հնարաւոր  է,  այլ  նաեւ՝  գեղեցիկ:  Սորված  էք ճանապարհորդակից  ըլլալ  կեանքի վերիվայրումներուն  ընդմէջէն  ու  ձեռք  ձեռքի  տուած՝ մարդկային  եւ  հոգեկան  փոխադարձ  աճումին նպաստել՝  հիմնուելով  Աստուծոյ  շնորքհին  վրայ:

Դուք  խոյս  չէք  տուած  ձեր  առաքելութենէն,  այլ՝ վստահած  էք  Արարիչի  խօսքին,  թէ՝  «Ինչ  որ Աստուած  միացուց  մարդ  թող  չբաժնէ»:  (Մարկոս, 10,9)

Ամէն  պարագային  մէջ,  ներառեալ  ամուսնութիւնն  ու  ընտանեկան  կեանքի պարագային  մէջ  մանաւանդ,  պարտինք  փնտռել  Աստուծոյ  կամքը:  Ի'նքն  է ամուսնութեան  հեղինակը:  Ի'նք  ուզած  է,  որ  ամուսնութիւնը  մնայուն  ու  շնորհաբեր խորհուրդ ըլլայ, որ ընկերութեան հիմն ու հիմնական բջիջը դառնայ:

Գիտնալով,  որ  մարդկային  բնութիւնը  տկար  է,  Պօղոս  առաքեալ  մեզի  կու  տայ բուռ մը կարեւոր խրատներ, հիմնելու համար լաւ եւ ամուր ամուսնութիւն մը: Ան կ'ըսէ. «Իրար  սիրեցէք  գորովանքով:  Յարգելու  մէջ  իրար  գերազանցեցէք»  (Հռոմ.  12,  10):

Ուստի,  սէրն  ու  յարգանքը  կարեւոր  ազդակներ  են  ամուսնացեալներու  կեանքին  մէջ:

Ապա  կը  պատգամէ  նաեւ.  «Յոյսով  ուրախացէք,նեղութեանց  մէջ  համբերող  եղէք,  յարատեւ  աղօթեցէք»:  Երբ  մէկը  անտարբեր  ըլլայ,  մերժէ  ներել  ու  աղօթքի  դիմել, ամուսնութիւնը  անպայման  կը  ձախողի,  սակայն,  երկուստեք  ջանքով  եւ  Աստուծոյ շնորհքին անսալով, ամուսնական կեանքը հաստատ կը մնայ:

Աղօթքը  մեզի  համար  անհրաժեշտ  է,  զօրանալու  մեր  յանձնառութիւններուն մէջ,  եւ  մեզի  ոյժ  ու  քաջութիւն  տալու  որպէսզի  ապրինք  մեր  ուխտերուն  համաձայն  ու երբեք չշեղինք ուղիղ ճանապարհէն:

Գալով  կեանքի  խաչերուն,  անոնք  երբեք  չեն  պակսիր,  սակայն,  Տէրը  մեզի կ'օգնէ  որպէսզի  զանոնք  կրենք  ու  յառաջ  երթանք:  Խաչը  անպարտելի  է:  Քրիստոսի սէրը միշտ յաղթական:

Ֆրանչիսկոս  Պապը  ամուսնացեալներէն  կը  խնդրէ,  որ  Տէրունական  աղօթքը՝ Հայր  մերը  բարձրացուցած  ատեննին  ըսեն  «  Եւ  զսէր  մեր  հանապազորդ  տուր  մեզ այսօր»,  որովհետեւ  Քրիստոսի  սէրն  է,  որ  մեզ  կը  զօրացնէ  առօրեայ ճանապարհորդութեան  ընթացքին:  Ի'նքն  է  մեր  հանապազօրեայ  հացը,  հացը՝  մեր հոգիներուն:

Թող  Աստուածածին  Մարիամ  եւ  Սուրբ  Յովսէփ՝  գերագոյն  տիպարը ամուսնական  կեանքի  հոյակապ  փայլքին,  ընկերակցին  ձեզի  եւ  բարեխօսեն  ձեզի համար: Ամէն: