Գերյ Յովսէփ Ծ Վ Քէլէկեան Սուրբ Խաչ թեմի առաջնորդի ընդհանուր տեղակալ:

(Ռատիօ Վատիկան) Գերյ Յովսէփ Ծ Վ Քէլէկեան, Փարիզի Սուրբ Խաչ հայ կաթողիկէ եկեղեցւոյ ժողովրդապետ, Գաբրիէլ, Միքայէլ եւ Ռաֆայէլ հրեշտակապետերու տօն` շաբաթ 5 նոյեմբերէն սկսեալ, Ֆրանսայի Հայ կաթողիկէներու առաջնորդ Գերապայծառ Յովհաննէս Թեյրուզեանի հրամանագիրով, կը ստանձնէ նաեւ Ֆրանսայի  Հայ Կաթողիկէ եկեղեցւոյ Սուրբ Խաչ թեմի առաջնորդի ընդհանուր տեղակալի պաշտօնը։

Գերյ Յովսէփ Ծ Վ Քէլէկեան ծնած է Պէյրութ 18 ապրիլ 1950-ին։ Զմմառու Նորընծայարան մտած է  Հոկտեմբեր 1959-ին, Աստուածաբանական եւ իմաստասիրութեան ուսումները ամբողջացուցած է  Հռոմի Յիսուսեաններու ''Գրիգորեան'' համալսարանին մէջ, 1965-1973։  Քահանայական ձեռնադրութիւն ընդունած է ձեռամբ Ամենապատիւ Իգնատիոս-Պետրոս ԺԶ.  Պաթանեան Կաթողիկոս Պատրիարքի, 9 դեկտեմբեր 1973-ին, Պէյրութ, Լիբանան։ Պաշտօնավարած է որպէս ժողովրդապետ Պէյրութի Աւետման եկեղեցւոյ մէջ - Պատրիարքարան (1973-1978)  Զմմառու փոքր նորընծայարանի փոխ տեսուչ, ապա տեսուչ (1978-1990), Փարիզի Սուրբ Խաչ ժողովրդապետութեան Հոգեւոր Հովիւ (1990-2007)։ 2007-ին նշանակուած է Հռոմի Լեւոնեան Վարժարանի տեսուչ (2007-2010), ապա մէկ տարի պաշտօնավարած է Հայաստան (Տաշիրի շրջան), որմէ ետք անուանուած է Երուսաղէմի Հայ Կաթողիկէներու Էքզարկ (2011-2013). ապա 2013-էն սկսեալ վերադարձած է Ֆրանսա ուր նախ ծառայած է Լիոն հուսկ դարձեալ Փարիզ։