(Ռատիօ Վատիկան) Հայիթի քաղաքը հարուածող Մաթիու փոթորիկին ի լուր, Վատիկանի Պետական Քարտուար Կարդինալ Փարոլին, ուրբաթ 7 հոկտեմբերին պատգամ յղած է, յանուն Ֆրանչիսկոս Սբրազան Քահանայապետին, Հայիթիի Եպիսկոպոսաց համահաւաք դասի նախագահ՝ Կարդինալ Շիպլի Լանկուային, որուն մէջ յայտնած է Ֆրանչիսկոս Պապին մասնակցութիւնը Հայիթի ժողպվուրդին վիշտերուն ու անոր աղօթքը բոլոր անոնց որոնք իրենց հարազատները կորսնցուցին։
Ծիրանաւորը յայտնած է Ֆրանչիսկոս Պապի ցաւակցութիւնները զոհերու հարազատներուն, հայցելով Աստուծմէ որ մեռեալները ընդունի Իր Լոյսին մէջ։ Կարդինալ Փարոլին ապա ապահովեցուցած է Սրբազան Հօր հոգեւոր մօտիկութիւնը` վիրաւորեալներուն եւ բոլոր անոնց որոնք տնանկ մնացած են։
Պատգամին աւարտին ծիրանաւորը գրած է ''Ֆրանչիսկոս Պապ ողջունելով եւ քաջալերելով ի գործ դրուած բոլոր ջանքերը Հայիթիի ժողովուրդը կը յանձնէ Մշտական օգնութեան Տիրամօր մայրական հովանիին, եւ անոնց կը շնորհէ մխիթարանքի ու յոյսի առաքելական օրհնութիւնները ։
All the contents on this site are copyrighted ©. |