Францішак выказаў салідарнасць насельніцтву Гаіці

Святы Айцец выказаў свой смутак і глыбокія спачуванні ў сувязі са шматлікімі ахвярамі, да якіх прывёў ураган “Мэцью” на Гаіці. Францішак моліцца за ўсіх, хто загінуў, і за тых, хто страціў сваіх блізкіх, гаворыцца ў тэлеграме за подпісам кардынала Дзяржсакратара Пьетра Параліна на імя старшыні мясцовага епіскапату. 

Пантыфік даверыў памерлых Божай міласэрнасці і запэўніў у сваёй духоўнай блізкасці і прыхільнасці параненых, а таксама ўсіх, хто страціў свае дамы і маёмасць у выніку стыхійнага бедства. Ён заахвоціў гаіцянскі народ да салідарнасць ва ўмовах новых выклікаў, якія стаяць перад краінай, і даручыў яго мацярынскай абароне Маці Божай Нястомнай Дапамогі.

Колькасць ахвяр урагану “Мэцью” на Гаіці перавысіла 330 і працягвае расці. “Гэта катастрафічная сітуацыя. Усё знаходзіцца ў крытычным стане”, - заявіў Прэзідэнт Жосэлерм Прывер. У некаторых населеных пунктах знесены 80% усіх пабудоў. Аб набліжэнні ўрагану насельніцтву паведамілі 5 дзён таму, але ўсіх эвакуіраваць не ўдалося. Многія адмовіліся пакідаць свае дамы, баючыся, што іх разрабуюць. Пасля разбурэнняў на Гаіці, “Мэцью” насоўваецца зараз на паўднёваўсходняе ўзбярэжжа ЗША.