Քոլոպիացի 13 միլիոն քուէարկողները 49,8 առ հարիւր թեր եւ 50,2 առ հարիւր դէմ քուէներով մերժեցին Քոլոմպիոյ իշխանութիւններուն եւ Քոլոմպիոյ յեղափոխական զինեալ ուժերուն միջեւ 27 սեպտեմբերին ստորագրուած, 52-ամեայ քաղաքացիական պատերազմին վերջ դնող պատմական համաձայնագիրը: «Ոչ»-ը յաղթանակ արձանագրեց 63 հազար քուէներու առաւելութեամբ:
Համաձայնութեան քննադատները կը յայտնեն, որ համաձայնութիւնը շատ մեղմ է Քոլոմպիոյ յեղափոխական զինեալ ուժերուն նկատմամբ: «Ոչ»-ի ճամբարի ղեկավար, Քոլոմպիոյ նախկին նախագահ Ալվարօ Ուրիպէ յայտնեց, որ բոլոր քոլոմպիացիները կ՛ուզեն խաղաղութիւն, սակայն համաձայնութիւնը «սրբագրումներու» կը կարօտի:
Քոլոմպիոյ նախագահ Խուան Մանուէլ Սանթոս յայտնեց, որ կ՛ընդունի արդիւնքը` աւելցնելով, որ զինադուլը կը մնայ ի զօրու: Ան բանագնացներուն հրամայեց մեկնիլ Քուպա` յաջորդ քայլին շուրջ խորհրդակցելու համար Քոլոմպիոյ յեղափոխական զինեալ ուժերու ղեկավարներուն հետ:
Վերջինիս ղեկավար Թիմոլէոն Խիմենեզ, որ ծանօթ է Թիմոչենքօ անունով, յայտնեց, որ իրենք յանձնառու կը մնան պատերազմին աւարտի մը ապահովման:
All the contents on this site are copyrighted ©. |