Ֆրանչիսկոս Սրբազան Քահանայապետին գործունէութիւնը։

(Ռատիօ Վատիկան) Ուրբաթ 23 սեպտեմբեր 2016-ի առաւօտեան Ֆրանչիսկոս Սրբազան Քահանայապետը իր գրասենեակին մէջ յաջորդաբար ընդունեց. առաքելական նուիրակ` գերապայծառ Ճիաչինթօ Պերլոքօ, Փերույի Թրույիլլոյի արքեպիսկոպոս` գերապայծառ Հեքթոր Միկել Քապրէոս Վիտարթէ, Յիսուսեաններու Գրիգորեան համալսարանի Ռէկտոր` Հայր Նունօ Տա Սիլվա  Կոնսալվէս եւ Կարդինալ Խօսէ Սարաիվա Մարթինսը։

Յայտնենք թէ Սրբազան Քահանայապետը շաբաթ 24 սեպտեմբերին, Պօղոս  Զ անուան սրահին մէջ, ունկնդրութիւն պիտի շնորհէ անցեալ 14 յուլիս 2016-ին Ֆրանսայի Նիս քաղաքին մէջ տեղի ունեցած ահաբեկչական արարքի զոհերուն ընտանեկան պարագաներուն։ Հուսկ` կիրակի 25 սեպտեմբերին, Ողորմութեան  արտակարգ Յոբելեանի առթիւ, Նորին Սրբութիւնը, Սուրբ Պետրոսի հրապարակին վրայ  կը հանդիսապետէ  սուրբ պատարագի արարողութեան, կրօնուսոյցներու  մասնակցութեամբ, որոնք Հռոմ ժամանած են նշելու համար իրենց ողորմութեան յոբելեանը։