Մեկնարկեց «Իմ Հայաստան» համահայկական փառատօնը՝ նուիրուած ՀՀ Անկախութեան 25-ամեակին

ՀՀ սփիւռքի նախարարութեան «Իմ Հայաստան» համահայկական փառատօնի ծիրէն ներս, Սեպտեմբեր 22-ին, Կոմիտասի անուան կամերային երաժշտութեան տան մէջ տեղի ունեցաւ Տուտուկի եւ հայկական այլ նուագարաններու փառատօնի բացման հանդիսաւոր արարողութիւնը: Այս մասին կը հաղորդէ ՀՀ սփիւռքի նախարարութեան մամուլի եւ տեղեկատւութեան գրասենեակը։

Հայաստանի Հանրապետութեան Նախագահի բարձր հովանիի ներքոյ, 2016-ին իրականացուող «Իմ Հայաստան» համահայ­կական փառատօնը  նուիրուած է Հայաստանի անկախութեան 25-ամեակին:

Համերգը Արամ Խաչատրեանի «Լեզգինկա»-ի կատարմամբ բացաւ Հայկական ազգային նուագարաններու պետական նուագախումբը` գեղարուեստական ղեկավար ՀՀ վաստակաւոր արուեստագէտ  Նորայր Դաւթեանի ղեկավարութեամբ:

Ելոյթ ունեցաւ ՀՀ վաստակաւոր արուեստագէտ Գէորգ Դաբաղեան: Հայկական ժողովրդական խաղիկներու շարանով հանդէս եկան Գաւառի Գէորգ Դաբաղեանի անուան տուտուկի դպրոցի սաները:

Այնուհետեւ ելոյթ ունեցաւ տուտուկահարներու մանկական եռեակը (Գագիկ Սահակեան, Թաթուլ Համբարձումեան, Գէորգ Ստեփանեան, դասատու` Ժիրայր Յարութիւնեան):

Ժողովրդական, ազգագրական երգերու եւ հայ մեծանուն երգահաններու, գուսաններու (Արամ Խաչատրեան,  Սայաթ-Նովա, Առնօ Բաբաջանեան, Ալեքսէյ Հեքիմեան, Խաչատուր Աւետիսեան, Աշուղ Աշոտ) ստեղծագործութիւններու կատարումներով հանդէս եկան Վալերի Նամը եւ Եուրա Սարգսեանը` Ռուսաստանէն, Իւանէ Մկրտչեան` Վրաստանէն, Էդուարդ Ճերճիյեանը եւ Մատիանա Թորոսեանը` Գանատայէն, Ճորճ Վանեսեանը` Սուրիայէն, Յակոբ Պապայեանը, Նորայր Սահակեանը, Համլէթ Դաշեանը եւ Սեդրակ Աւագեանը` Արցախէն, ինչպէս նաեւ այլ երաժիշտ-կատարողներ Հայաստանէն: Բեմէն առաջին անգամ հնչեցին մեղեդիներ` գրուած տուտուկի համար:

Շնորհակալութիւն յայտնելով գերմանացի ժողովուրդին եւ Պեռլինի Պունտեսթակին 2016թ. Յունիս 18-ին Հայոց ցեղասպանութիւնը դատապարտող բանաձեւը ընդունելու համար` հանդիսավար Սարգիս Նաջարեան բեմահարթակ  հրաւիրեց գերմանացի տուտուկահար Սեորէն Պիրկէին (նուագակցողներ` Ոււէ Ֆիշեր, Աքսել Լորենց եւ երգահան` Տիրք Միքաելիսը) եւ Գրեգոր Շուլենպերկը:

Հայաստանի քանոնահարներու անսամբլի կատարմամբ (գեղարուեստական ղեկավար` ՀՀ ժողովրդական արուեստագիտուհի Յասմիկ Լէյլոյեան) հնչեցին Սայաթ-Նովայի «Լալանին» եւ «Բռոի-բռոի» ստեղծագործութիւնները:

Ցուցադրուեցան հայկական հնագոյն նուագարաններու` ծիրանափողի, քանոնի, պարկապզուկի ստեղծման եւ պատմութեան մասին տեսաֆիլմեր:

Նշենք, որ Սեպտեմբեր 23-ին Տուտուկի փառատօնի մասնակիցները համերգային ծրագիրով հանդէս կու գան Թալինի մէջ: Իսկ Սեպտեմբեր 24-ին Գաւառի մէջ տեղի կ’ունենայ փառատօնի փակման հանդիսաւոր արարողութիւնը:

Փառատօնի մասնակիցները կ’այցելեն Հայոց Ցեղասպանութեան թանգարան-հիմնարկ, Հայաստանի ազգային պատկերասրահ,  Գառնիի հեթանոսական տաճար եւ Գեղարդի վանք, Օշականի մէջ  ծաղիկներ կը դնեն Մեսրոպ Մաշտոցի շիրիմին, իսկ Երեւանի մէջ` ՀՀ ազգային հերոս Թաթուլ Կրպէյեանի յուշարձանին: