Երեքշաբթի, 20 Սեպտեմբեր 2016-ի առաւօտ, հանդիսաւորապէս կատարուեցաւ Ռահւա գիւղի Ս. Աստուածածին հիմնովին վերանորոգուած եկեղեցւոյ վերօծման արարողութիւնը, ձեռամբ Ատրպատականի Հայոց Թեմի Առաջնորդ` Գերշ. Տ. Գրիգոր Ս. Եպս. Չիֆթճեանի:
Եկեղեցական Սրբազան արարողութեան կը մասնակցէին Ուրմիոյ Հոգեւոր հովիւ` Արժ. Տ. Ներսէս Քհնյ. Պասիլեան, կիսասարկաւագաց եւ դպրաց դասերը: Հանդիսաւոր արարողութեան ներկայ գտնուեցան Ասորի Քաղդէացի եւ Ասորի Աւետարանական եկեղեցիներու հոգեւորականներ, որոնք իրենց եկեղեցին ունին Ս. Աստուածածին եկեղեցւոյ հարեւանութեամբ: Հոգեպարար արարողութեան ներկայ գտնուեցան Երեփոխանական ժողովի, Ուրմիոյ Թաղականութեան անդամներ, Ռահւայի Հոգաբարձութեան եւ Տիկնանց Միութեան անդամներ, Ասորի եկեղեցւոյ վարչութեան անդամներ, ինչպէս նաեւ Ռահւա գիւղի հաւատացեալներն ու Ուրմիայէն, Գեարդաբադ գիւղէն եւ Թաւրիզէն ժամանած հայորդիներ:
Առաջնորդ Սրբազանը գիւղ ժամանելով դիմաւորուեցաւ տեղի Հոգաբարձութեան անդամներուն եւ Ուրմիոյ Թաղականութեան կողմէ: Անմեղ մանուկներու ձեռամբ տեղի ունեցաւ ծաղկեմատոյց, որմէ ետք Սրբազան Հայրը օրհնեց գիւղի աղն ու հացը: Ապա, եկեղեցւոյ մուտքին, փակ դրան դիմաց ծնրադիր, կատարեց դռնբացէքի խորհրդանշական արարողութիւնը, որմէ ետք, «զողորմութեան քո զդուռն բաց» շարականի երգեցողութեամբ, հաւատացեալներու բազմութեան հետ միասին մուտք գործեց ներս, սկսելու համար եկեղեցւոյ օծման կարգը:
Ժամը 11.30-ին, եպիսկոպոսական հանդերձանքով, Առաջնորդ Սրբազանը «Հրաշափառ» շարականի երգեցողութեամբ յառաջացաւ բեմ, օծելու համար խորանը, որ դարեր առաջ լեռնային միակտոր քարով շինուած էր:
Ապա, Սաղմոսի ողոգոմեան եղանակով երգուած յուզախառն տողերը իբրեւ օծման նախապատրաստութիւն երգուեցան, որոնց աւարտին Սրբազան Հայրը «Առաքելոյ Աղաւնոյ» շարականի երգեցողութեամբ, երեք անգամ խորանի գագաթին հեղեց Անթիլիասի մէջ օրհնուած սրբալոյս Միւռոնէն, եւ խաչանիշ օծեց զայն: Ապա, չորս սիւները չորս Աւետարանիչներուն անունով օծելէ ետք, խորանի բեմին ճակատը օծեց, ինչպէս նաեւ սրբատունն ու սարկաւագատունը եւ մկրտութեան աւազանը: Ապա, եկեղեցւոյ մնացեալ 12 սիւները, Յիսուսի միւս աշակերտներուն, 13-րդ առաքեալ Ս. Պօղոսին եւ Ս. Գրիգոր Լուսաւորչի անունով օծելէ ետք, Սրբալոյս միւռոնով օծեց նաեւ եկեղեցւոյ աւագ դուռը: Անուանակոչութեան պահուն, եկեղեցւոյ մէջ կատարուած անդաստանով եկեղեցին վերստին կոչուեցաւ Ս. Աստուածածին, այն անունով որով անուանած էին մեր նախնիք սոյն եկեղեցին 17-րդ դարուն: Ապա, լուցուեցան խորանի հինգ աշտանակները, եւ Սրբազան Հօր ձեռամբ վառուած մոմէն, բոլոր հաւատացեալները վառեցին իրենց ուխտի մոմերը, մինչ կ՛երգուէր «Լուսաւորեա՛ Երուսաղէմ» շարականը:
Առաջնորդ Սրբազանը իր քարոզին մէջ շեշտեց եկեղեցաշինութեան երեւոյթը, որ Ատրպատականցի հայուն բնորոշ առաքինութիւն է. «Այն դարերուն երբ չկային այսօրուան շինարարական գործիքները, մեր հայրերը հաւատքով կառուցեցին մեր թեմի աւելի քան 200 եկեղեցիները: Նոյն հաւատքը մղեց ձեզ, որ վերանորոգէք ձեր հնադարեայ եկեղեցին, առաւել ամրապնդելով ձեր հաւատքը: Անոնք որոնք իրենց ձեռքերը խառնեցին շաղախին, երկաթի եւ ելեկտարականութեան գործերը կատարեցին նուիրաբերելով իրենց ժամանակը, բոլորիս գնահատանքին արժանի են: Նաեւ անոնք, որոնք իրենց նիւթական նուիրաբերումով, հեռաւոր երկիրներէն եւ մօտակայ քաղաքներէն օժանդակել էին սոյն վերանորոգութեան աշխատանքին, դարձեալ մեր բոլորի գնահատանքին արժանի են: Եթէ մեր հայրերը այսքա՜ն եկեղեցիներ կտակեր են մեզի, ուրեմն մենք ալ իբրեւ անոնց յետնորդները, պարտաւոր ենք պահպանել այն` ինչ որ ժառանգեր ենք անոնցմէ», ըսաւ Սրբազան Հայրը եւ իր քարոզի աւարտին իբրեւ իր գնահատանքին շօշափելի արտայայտութիւն, յուշանուէր յանձնեց վերանորոգութեան ամբողջ ընթացքին կամաւորաբար հսկած Համազասպ Մկրտիչեանին: Իսկ Հոգաբարձութեան անունով յուշանուէր մը յանձնուեցաւ փայտածածկ տանիքին ամբողջական նորոգութիւնը յանձն առած Աբրահամ Եունանփուռին:
Իր քարոզի աւարտին, Սրբազանը Հայրը նաեւ օծեց մէկ զոյգ քշոցներ` վեցթեւեան Սերովբէներու բարձրաքանդակներով, նուիրատուութեամբ Աւետիս Յովակիմեանի, ի յիշատակ իր կնոջ` Մարի Յովակիմեանին, եւ երկու ձեռաց խաչեր, հայկական զարդանախշերով ձուլուած, նուիրատուութեամբ Էտի Ապուտեանի, որոնք նուիրաբերուած էին Ուրմիոյ ծխական Ս. Ստեփանոս եկեղեցիին:
Վերօծման հանդիսաւոր ու հոգեպարար արարողութենէն ետք, եկեղեցւոյ շրջափակին մէջ տեղի ունեցաւ ճաշկերոյթ, որու ընթացքին ներկաները ճաշակեցին բոլոր հանգուցեալ նախահայրերուն եւ եկեղեցին կառուցողներու հոգիին համար պատրաստուած մատաղը:
Յայտնենք, թէ` Ռահւայի Ս. Աստուածածին եկեղեցւոյ վերջին նորոգութիւնը կատարուած էր 1892 թուին, իսկ 2012 թուականէն մինչեւ 2016 տեւած էր այս մասնագիտական վերանորոգութիւնը, որուն յիշատակարանը, մարմարի վրայ քանդակուած, զետեղուած էր եկեղեցւոյ մայր դրան ճակատին:
All the contents on this site are copyrighted ©. |