(Ռատիօ Վատիկան) Յառաջիկայ կիրակի` 4 սեպտեմբեր 2016-ի առաւօտեան ժամը 10-ին, Սուրբ Պետրոսի հրապարակին վրայ նախատեսուած Մայր Թերեզայի սրբադասման արարողութեան առթիւ, անոր հիմնած ''Գթութեան առաքեալներ'' միաբանութեան նախաձեռնութեամբ կազմակերպուած են զանազան ձեռնարկներ, հանդիպումներ, աղօթքներ ու համերգներ։
Ասոնց շարքին նշենք` 30 օգոստոս 2016-ի առաւօտեան 10-ին, Հռոմի ''Ռեճինա Չելի'' բանտին մէջ հանդիպում` զօրակցութեան, բաժնեկցութեան ու մասնակցութեան տիեզերական արժէքներու մասին, զոր 1979-ին Խաղաղութեան Մրցանակի արժանացող Մայր Թերեցան ուզեց տարածել համայն մարդկութեան։
Ապա ուրբաթ 2 սեպտեմբեր 2016-ին Հռոմի Սուրբ Անասթազիոսի Պազիլիքային մէջ առաւօտեան ժամը 9-ին, 10-ին եւ 12-ին, անգլերէն լեզուով սուրբ պատարագներ ու երեկոյեան 8,30-էն մինչեւ 10-ն, ''Տարածենք Քրիստոսի լոյսը` սրբութեան կոչում'' խորագիրով աղօթքի հսկում եւ սուրբ հաղորդութեան երկրպագութեան պաշտամունք, Լատերանեան Սուրբ Յովհաննէսի Մայր տաճարին մէջ, մասնակցութեամբ Հռոմի Թեմի երգչախումբին։
Հուսկ շաբաթ 3 սեպտեմբեր 2016-ի յետմիջօրէին համերգ` Սանդ Անտրէա Տէլլա Վալլէ եկեղեցւոյ մէջ որուն կը յաջորդէ սուրբ պատարագի զոհը եւ Երանելի Մայր Թերեզայի մասունքներու մեծարանքը, մինչ երեկոյեան 19,30-ին Հռոմի պարիսպներէն դուրս Սուրբ Պօղոսի պազիլիքային մէջ նախատեսուած է ''Kosovo Philarmony'' երաժշտախումբի կատարողութեամբ այլ համերգ մը։
All the contents on this site are copyrighted ©. |