2016-08-11 10:47:00

Ազգ. Ապահովութեան մարզի անդամ 50 հանրապետականներ Թրամփի դէմ բաց նամակ կը հրապարակեն


Միացեալ Նահանգներու ազգային ապահովութեան մարզի 50 հանրապետական մասնագէտներ բաց նամակ մը ստորագրեցին` զգուշացնելով, որ Տանըլտ Թրամփը Միացեալ Նահանգներու պատմութեան մէջ «ամէնէն անխոհեմ նախագահը պիտի ըլլայ»:

«Նիւ Եորք Թայմզ» օրաթերթին մէջ հրապարակուած նամակը ստորագրողներուն շարքին են «Սի.Այ.Էյ.»-ի նախկին տնօրէն Մայքըլ Հայտըն, ազգային տեղակահաւաքի առաջին տնօրէն, արտաքին գործոց փոխնախարար Ճոն Նեկրոփոնթէ, արտաքին գործոց փոխնախարար, Միջազգային դրամատան նախկին նախագահ Ռապըրթ Զոլիք եւ Տիք Չէյնիի ազգային անվտանգութեան հարցերով խորհրդատու Էրիք Էտըլման: Անոնք կը յայտնեն, որ Թրամփ նախագահ ըլլալու «նկարագիրը, արժանիքներն ու փորձառութիւնը չունի»:

Անոնցմէ շատեր մարտին մերժած էին նոյնպիսի բաց նամակ մը ստորագրել: Անոնց նամակը թէեւ Հիլըրի Քլինթընին ի նպաստ քուէարկելու կոչ մը չէր պարունակեր, սակայն անոնք յստակօրէն նշեցին. «Մեզմէ ոչ մէկը պիտի քուէարկէ ի նպաստ Տանըլտ Թրամփին»:

«Ան կը թուի նուազագոյն չափով ծանօթ չըլլալ եւ չհաւատալ Միացեալ Նահանգներու սահմանադրութեան, օրէնքներուն եւ հաստատութեանց, ներառեալ` կրօնական հանդուրժողականութեան, մամլոյ ազատութեան եւ անկախ արդարադատութեան», նշուած է նամակին մէջ` աւելցնելով. «Ան կը տկարացնէ Միացեալ Նահանգներու իբրեւ ազատ աշխարհի ղեկավար բարոյական հեղինակութիւնը»:

Նշենք, որ Թրամփ հարցականի տակ առած է ՕԹԱՆ-ի նկատմամբ Միացեալ Նահանգներու յանձնառութիւնը յարգելու կարեւորութիւնը, զօրակցած է չարչարանքի կիրարկման եւ առաջարկած, որ Հարաւային Քորէան ու Ճափոնը զինուին հիւլէական զէնքերով:

Թրամփ հակադարձելով նշեց, որ նամակը ստորագրողները մաս կը կազմեն «Ուաշինկթընի ձախողած վերնախաւին», որ կը ջանայ իշխանութեան կառչիլ` աւելցնելով. «Ժամանակն է, որ անոնք իրենց արարքներուն համար հաշուետու դառնան»:

Նշենք, որ Հանրապետական կուսակցութեան բազմաթիւ ականաւոր անդամներ մերժած են Թրամփը ճանչնալ իբրեւ Հանրապետական կուսակցութեան նախագահական թեկնածու:

Միւս կողմէ, «Ուաշինկթըն Թայմզ» երէկ հաղորդեց, որ սեւամորթ ամերիկացիներուն 99 առ հարիւրը կը զօրակցի Դեմոկրատական կուսակցութեան թեկնածու Հիլըրի Քլինթընի:








All the contents on this site are copyrighted ©.