Новапрызначаны Апостальскі адміністратар Лацінскага Патрыярхата Іерусаліма П’ербаціста Піцабала развеяў супярэчлівыя чуткі аб магчымым падзеле гэтай касцёльнай структуры. Не будзе ніякай асобнай дыяцэзіі для Іарданіі або для іўрытамоўных католікаў, сказаў біскуп-элект у інтэрв’ю нямецкаму каталіцкаму інфармацыйнаму агенцтву “KNA”.
“Дыяцэзія вялікая, але мы павінны прымаць да ўвагі не толькі геаграфічны аспект, але і яе склад. Ідэальнага рашэння не існуе, але Святая Зямля заўсёды была адзінай і будзе заставацца такой”. Акрамя таго, не чакаюцца новыя біскупскія прызначэнні.
Італьянскі францішканін, чыё біскупскае пасвячэнне адбудзецца ў Бергама 10 верасня 2016 г., з 24 чэрвеня з’яўляецца пастырам Патрыярхата, у які ўваходзяць: Ізраіль, Іарданія, Кіпр і Палестына.
Ён прызнаўся, што цэнтральнае месца ў яго служэнні зойме дыялог і спроба зразумець сітуацыю знутры. Гэта дапаможа вырашыць, што рабіць у будучыні. “Мы – Касцёл, і павінны працаваць як адзінае цэлае”, - сказаў Апостальскі адміністратар і дадаў, што гаворка ідзе пра “Касцёл адкрыты”.
Трэба нагадаць, што на працягу апошніх дванаццаці гадоў айцец П’ербаціста Піцабала быў францішканскім Кусташам Святой Зямлі.
All the contents on this site are copyrighted ©. |