Երանելի Պօղոս Զ Պապին մահուան 38-րդ ամեակը

(Ռատիօ Վատիկան) Այսօր՝ 6 օգոստոս 2016-ին, կը նշուի Երանելի Սուրբ Պօղոս Զ Քահանայապետին վախճանման 38-րդ ամեակը, որ պատահած է 6 օգոստոս 1978-ին՝  Քասթել Կանտոլֆօ Պապական ամարանոցին մէջ,  Յիսուսի այլակերպման տօնին օրը։

Աւազանի անունով Ճովաննի Պաթթիսթա Մոնթինի, ծնած է Իտալիոյ Պրեշիա քաղաքի՝ Քոնչեսի գիւղաղաքին մէջ՝ 26 սեպտեմբեր 1897-ին։ Ան քահանայապետ ընտրուած է 21 յունիս 1963-ին, յաջորդելով Յովհաննէս ԻԳ երաջանկայիշատակ Սուրբ Քահանայապետին։  

Աշխարհի մեծ յեղաշրջումի ժամանակամիջոցին,  Պօղոս Զ Պապը Տիեզերական եկեղեցին ղեկավարած է մեծ  ուշիմութեամբ։ Ան իր աւարտին հասցուցած է  Սուրբ Յովհաննէս ԻԳ Պապի կամքով սկիզբ առած Վատիկանեան Տիեզերական Բ Ժողովը։։

Արժանի է նշել, թէ երանելի Սուրբ Պօղոս Զ Պապ  եղած է Եկեղեցւոյ բարեկարգումի մեծ դերակատարը ու թափ տուած է  Քահանայապետերու միջազգային ճամբորդութիւններուն։

Պենետիկտոս ԺԶ Քահանայապետը 20 դեկտեմբեր 2012-ին. Պօղոս Զ դասած էր Աստուծոյ Ծառաներու շարքին եւ Ֆրանչիսկոս Պապ` 19 հոկտեմբեր 2014-ին զայն հռչակած է Երանելի։