“Papa Françesku është informuar dhe merr pjesë në dhimbjen dhe në tmerrin për këtë dhunë absurde, me dënimin më të ashpër për çdo formë urrejtjeje e me lutje për viktimat”: menjëherë pas sulmit kundër një kishe në Normandi të Francës, zëdhënësi i Selisë së Shenjtë, atë Federico Lombardi, bëri një deklaratë për mediat, për të shprehur dhimbjen e Papës Françesku.
“Është lajm i ri i tmerrshëm, që i shtohet serisë së dhunës, e cila na ka shkandulluar këto ditë, duke shkaktuar dhimbje dhe shqetësim të madh. Po e ndjekim gjendjen dhe po presim lajme të mëtejshme për të kuptuar më mirë ç’po ndodh”, deklaron atë Lombardi. “Na bën veçanërisht përshtypje fakti që kjo dhunë e tmerrshme ndodhi në një kishë, vend i shenjtë, në të cilin kumtohet dashuria e Zotit, me vrasjen barbare të një meshtari e me përfshirjen e besimtarëve. Jemi pranë Kishës së Francës, kryedioqezës së Rouenit, bashkësisë së goditur e popullsisë franceze”.
Menjëherë pas deklaratës së atë Federico Lombardit, u bë i njohur telegrami i ngushëllimit të Atit të Shenjtë, nënshkruar nga Sekretari i Shtetit të Vatikanit, kardinali Pietro Parolin, drejtuar kryeipeshkvit të Rouenit, imzot Dominique Lebrun. “Papa Françesku siguron afërsinë e tij shpirtërore dhe bashkohet me lutje e me vuajtjet e familjeve, si edhe me dhimbjen e famullisë dhe të dioqezës së Rouenit – shkruhet në mesazh. Ai i lutet Zotit, Atit të mëshirshëm, që ta pranojë atë Jacques Hamel në paqen e dritës së Tij dhe të ngushëllojë të dëmtuarit. Ati i Shenjtë është veçanërisht i shqetësuar nga ky akt dhune kundër një kishe, gjatë kremtimit të meshës, liturgji, në të cilën i përgjërohemi Zotit për paqe në të gjithë botën. Ai i kërkon Hyjit të dikojë tek të gjithë mendime pajtimi dhe vëllazërie në këtë sprovë të re dhe i jep secilit bekimin e tij apostolik”.
All the contents on this site are copyrighted ©. |