Афіцыйныя СМІ Апостальскай Сталіцы паведамілі аб пахаванні арцыбіскупа Зыгмунта Зімоўскага, старшыні Папскай рады пастырства работнікаў сферы аховы здароўя. Пахавальная цырымонія адбылася 19 ліпеня 2016 г. у катэдральным касцёле польскага горада Радам. Перад сваім прызначэннем у Ватыкан іерарх быў пастырам Радамскай дыяцэзіі.
Літургію ўзначаліў арцыбіскуп Кракаўскі, кардынал Станіслаў Дзівіш. Удзел у св. Імшы прынялі шэсцьдзесят іерархаў і звыш двухсот польскіх святароў. Сярод прысутных быў таксама Апостальскі нунцый, арцыбіскуп Чэлесціна Мільёрэ, а таксама рэгент Апостальскай Пэнітэнцыярыі кс. Кшыштаф Ныкель, паведаміла “L’Osservatore Romano”.
“Ён жыў, каб служыць” – прывяла афіцыйная ватыканская крыніца словы арцыбіскупа Чэнстаховы Вацлава Дэпа, якімі іерарх падсумаваў жыццё спачылага. Гэтыя словы пацвердзіў і журналіст Франка Бальдзарэці ў змешчаным побач артыкуле, прысвечаным арцыбіскупу Зімоўскаму.
Аўтар матэрыяла ўзгадаў гамілію іерарха, якую той прамовіў падчас літургіі на адкрыццё XXIII Кангрэсу Сусветнай федэрацыі каталіцкіх медыкаў Лурда. Падчас яе арцыбіскуп Зімоўскі сказаў: “Прашу вас з мужнасцю абвяшчаць Евангелле любові сучаснаму свету, даючы надзею хворым, церпячым, тым, хто прабывае ў роспачы, хто прагне праўды і супакою. Робячы дабро бліжняму, вы сведчыце, што Бог ёсць любоў. Толькі калі да сэрца чалавека дакранаецца Божае слова, яго энергія накопліваецца, каб прымаць веру. Вера – гэта дар і адначасова заданне бачыць Езуса ў бліжнім”.
Арцыбіскуп Зімоўскі часта засяроджваўся на зямных пакутах чалавека і казаў, што яны перажываюцца ў святле веры, узгадаў Бальдзарэці. Вера ў гэтым выпадку не проста карысная – яна неабходная, казаў іерарх.
Спачылы арцыбіскуп заўсёды выступаў у абарону жыцця і чалавечай годнасці, заклікаў адважна супрацьстаяць распаўсюджванню практык аборту, эўтаназіі, штучных метадаў зачацця. “Толькі так, аб’яднаўшы нашыя намаганні, зможам спыніць прасоўванне наперад культуры смерці”, - сцвярджаў арцыбіскуп Зімоўскі. Пры гэтым ён з глыбокай верай паўтараў: “Бог ніколі нас не пакідае!”, - гаворыцца ў артыкуле.
All the contents on this site are copyrighted ©. |