Պատմական Անին կ՛ընդգրկուի համաշխարհային մշակութային ժառանգութեան ցանկին մէջ

Պոլսոյ մէջ տեղի ունեցած ԵՈՒՆԵՍՔՕ-ի Մշակութեաին ժառանգութեան կոմիտէի 40-րդ նստաշրջանին կատարուած քուէարկութեան արդիւնքով Անի քաղաքը ընդգրկուած է համաշխարհային մշակութային ժառանգութեան ցուցակին մէջ: Յիշեցնենք, որ 2012 թուականին Անին ընդգրկուած էր ԵՈՒՆԵՍՔՕ-ի համաշխարհային մշակութային ժառանգութեան ժամանակաւոր ցուցակին մէջ:

Թուրքիոյ ներկայացուցիչը իր ելոյթին մէջ նշած է, որ Անի հին քաղաքը Թուրքիոյ տարածքին մէջ գտնուող թիւով 16-րդ շրջանն է, որ ընդգրկուած է ԵՈՒՆԵՍՔՕ-ի համաշխարհային մշակութային ժառանգութեան ցուցակին մէջ: Ան ԵՈՒՆԵՍՔՕ-ի որոշումը որակած է իբրեւ «հանդուրժողականութեան, բազմազանութեան եւ երկխօսութեան» համար կատարուած կարեւոր քայլ. «Անատոլիան (Փոքր Ասիան-ակունքի խմբ.) ոչ թէ մշակոյթներու ու քաղաքակրթութիւններու գերեզման, այլ թանգարան է: Այս որոշումը հպարտութիւն կը ներշնչէ: Այսօր ապագայի վերաբերեալ յուսադրող որոշում կայացուցինք»,- «Ակունք»-ի փոխանցմամբ ըսած է ան։

 Թուրքիոյ ներկայացուցիչը որոշման կայացման մէջ կարեւոր համարած է Վրաստանի, Իրանի եւ Հայաստանի ներկայացուցիչներու դերակատարութիւնը` շեշտելով, որ «քաղաքակրթութիւնն ու մշակոյթը պէտք է բռնութենէ եւ տարակարծութենէ վեր դասել»:

Այնուհետեւ ելոյթով հանդէս եկած է Հայաստանի ներկայացուցիչը` յայտնելով, որ այս որոշումը մեծ նշանակութիւն ունի Հայաստանի համար, որուն պատմական արժէք ներկայացնող ժառանգութիւններուն մեծ մասը դուրս է իր ներկայ սահմաններէն: Ան նշած է, որ միջնադարեան Հայաստանի մայրաքաղաք Անին Հայաստանի համար թանկարժէք զարդ է, այնուհետեւ աւելցուցած է, որ «Անին կը պատկանի ոչ թէ մէկ ազգի, այլ համայն մարդկութեան»։