5 nëntori 2016, data e lumnimit të 38 martirëve shqiptarë

5 nëntori 2016 është data e lumnimit të 38 martirëve shqiptarë të komunizmit. Mesha do të kremtohet në sheshin para katedrales së Shën Shtjefnit në Shkodër. Lajmi u dha dje pasdite nga Konferenca Ipeshkvnore e Shqipërisë, e njoftuar për këtë me një letër të Papës Françesku, mbërritur përmes Sekretarisë së Shtetit të Vatikanit. Në njoftimin zyrtar vihet në dukje se mesha e lumnimit do të kryesohet nga Prefekti i Kongregatës për Çështjet e Shenjtorëve, kardinali Angelo Amato.

Kujtojmë se procesi dioqezan për lartimin e martirëve në nderimet e elterit filloi më 10 nëntor 2002 dhe përfundoi më 8 dhjetor 2010. Më pas, dokumentet u dërguan në Kongregatën për Çështjet e Shenjtorëve në Vatikan, ku vijoi verifikimi i dëshmive të martirizimit. Papa Françesku nënshkroi dekretin e lumnimit më 26 prill të këtij viti. Kryetari i Konferencës Ipeshkvnore të Shqipërisë, imzot Angelo Massafra shkruan: “Tashmë, na takon neve t’i naltojmë e të përgatitemi për t’i nderuar me festën tonë të hareshme shpirtërore. Si Arqipeshëv që ka çuar përpara proçesin e Martirëve, me ekipin e gjyqit kishtar, të cilin e falënderoj, si Arqipeshkëv i Vendit ku do të kremtohet Mesha e Lumnimit dhe në emër të Konferencës Ipeshkvore, ju bëj thirrje dhe ju nxis për të kremtuar sa më denjësisht këtë moment historik për Kishën dhe Kombin”.