Մաչերաթա – Լորեթօ 38-րդ հետիոտն ուխտագնացութիւնը։

(Ռատիօ Վատիկան) Յառաջիկայ շաբաթ` 11 յունիս 2016-ին երեկոյեան 8.30-ին, Անքոնա-Օզիմօ թեմին եպիսկոպոս ` գերապայծառ Էտոարտօ Մենիքելլիին գլխաւորած սուրբ պատարագի արարողութեամբ բացումը կը կատարուի Մաչերաթա – Լորեթօ հետիոտն ուխտագնացութեան 38-րդ փուլին, որուն 2016- տարուայ նշանաբանն է ''Դուն մէկ հատիկ ես'' եւ որ կը յատկանշէ Յիսուսի հայեացքը ուղղուած մեզմէ իւրաքանչիւրիս­, որով Ան կ՛ուզէ արժէքաւորել մեզմէ ամէն մին ու այնպէս ընել որ այս գանձերէն եւ ոչ մէկը կորուստի մատնուի։ 

Մաչերաթա – Լորեթօ 38-րդ հետիոտն ուխտագնացութեան առթիւ, չորեքշաբթի 8 յունիսի հրապարակային ունկնդրութեան ընթացքին, Ֆրանչիսկոս Սրբազան Քահանայապետը պիտի օրհնէ ուխտագնացութեան ''խաղաղութեան Ճրագը'' որ ապա պիտի առաջնորդէ Մաչերաթայէն դէպի  Լորեթոյի մարեմեան սրբավայր ընթացող ուխտաւորները։