ԹԱՍՍ լրատու գործակալութիւնը կը հաղորդէ, որ Գերմանիոյ վարչապետ Անկելա Մերքել Պոլսոյ մէջ Թուրքիոյ նախագահ Ռեճեփ Թայիփ Էրտողանի հետ բանակցութիւններու աւարտին յայտարարած է, որ Թուրքիոյ ղեկավարութիւնը պէտք է կատարէ նախապէս Եւրոպական Միութեան նշած բոլոր կէտերը` մուտքի արտօնագիրի դրութեան ազատականացման համար, այլապէս այդ երկրին եւ Եւրոպական Միութեան միջեւ մուտքի արտօնագիրի դիւրացումը ուժի մէջ պիտի չմտնէ:
«Ես հասկցուցած եմ, որ դէպի ազատ մուտքի արտօնագիր տանող ճամբան հիմնուած է 72 կէտերուն վրայ: Անոնք նորութիւն չեն: Եւրոպական Միութիւնը զանոնք արդէն ներկայացուցած է դեկտեմբեր 2013-ին: Մենք կը պահանջենք, որ իրագործուին բոլոր կէտերը` ազատ մուտքի արտօնագիրի դրութիւն տրամադրելու համար», ըսած է Մերքել:
Ներկայիս Եւրոպական Միութիւնը «կասեցուցած» է Թուրքիոյ հետ մուտքի արտօնագիրի դրութեան ազատականացման հոլովոյթը, որովհետեւ Թուրքիան մինչեւ հիմա 72 պահանջներէն միայն 5-ը կատարած է:
All the contents on this site are copyrighted ©. |