Ֆրանչիսկոս Պապը 23 Մայիսին Վատիկանի մէջ կ´ընդունի Ալ Ազհար մզկիթի իմամը։

(Ռատիօ Վատիկան) Երկուշաբթի 23 Մայիս 2016-ը պիտի հանդիսանայ պատմական թուական  քանի առաջին անգամուան համար Քահանայապետ մը ու Ալ Ազհար մզկիթի իմամ մը իրարու կը հանդիպին։

Արդարեւ ֆրանչիսկոս Պապը Վատիկանի մէջ պիտի ընդունի Ալ Ազհար համալսարանի իմամ` Ահմէտ էլ Թայէպ։ Լուրը մամուլին հաղորդած է Ս. Աթոռի մամլոյ գրասենեակի տնօրէնը ու Քահանայապետի բանբեր` Յիսոււսեան հայր ֆետերիքօ Լոմպարտի։

Նշենք որ Շէյխ Ahmed Mohamed el-Tayeb սերտած է իսլամական մտածումը Փարիզի Սորպոն եւ Զուիցերիոյ ֆրիպուկ համալսարաններուն մէջ։

ֆրանչիսկոս Քահանայապետը իր ընտրութենէն ասդին միշտ աշխատած է կապ հաստատել ու բարւոքել յարաբերութիւնը իսլամ աշխարհին հետ։

2013ի Դեկտեմբերին Ալ Ազհարին որպէս պատուիրակ ուղարկած է Միջկրօնական երկխօսութեան քահանայապետական խորհուրդի քարտուղարը գերապայծառ` Միկել Անճել Աեուզօ Կիսոն։ Նախապէս ֆրանչիսկոս Պապը` Ռամատանի տօնին առթիւ անձամբ պատգամ մը ուղղած էր իսլամ աշխարհին որուն մէջ գրած էր ´´այս տարի, առաջինը իմ քահանայապետութեանս,  ուզեցի անձամբ գրել այս աւանդական պատգամը որպէս նշան գնահատանքի ու բարեկամութեան հանդէպ բոլոր մահմետականներուն ու մասնաւորապէս կրօնապետերուն´´։

Նոյն տարուայ Սեպտեմբերին Նորին Սրբութիւնը անձնական պատգամ մը ուղարկեց Ալ Ազհարի Աւագ իմամին` Եգիպտոսի առաքելական դեսպանին միջոցաւ։ Մէկ ամիս ետք ֆրանչիսկոս Պապը Հռոմի մէջ ընդունեց  Գահիրէի Աւագ մուֆթին։

Մարտ 2014-ին Ալ Ազհարի համալսարանի մէկ ներկայացուցիչը Վատիկան եկաւ ստորագրելու միջ կրօնական համաձայնագիր մը` մարդկային էակներու ստրկութեան (գերեվաճառութեան) դէմ։ Հուսկ 24 Նոյեմբեր 2014-ին Եգիպտոսի հանրապետութեան նախագահ Abdel Fattah al-Sissi այցելութիւն կատարեց ֆրանչիսկոս Պապին, ի նշան երկխօսութեան վերահաստատումին Ս. Աթոռի ու Ալ Ազհար համալսարանի միջեւ։

Անցեալ Փետրուարին Միջ կրօնական երկխօսութեան քահանայապետական խորհուրդի քարտուղարը` գերապայծառ Աեուզօ Կիսօ ընկերակցութեամբ Եգիպտոսի մօտ Ս. Աթոռի առաքելական դեսպան` գերապայծառ Bruno Musarò-ի այցելութիւն տուաւ Ալ Ազհար համալսարանին։ Այդ առթիւ գերապայծառ Աեուզօ Կիսօ` յանձնեց  կարդինալ Ժան Լուի Թոռանի` միջ կրօնական երկխօսութեան քահանայապետական խորհուրդի նախագահին նամակը, որով կարդինալը կը յայտնէր իր տրամադրութիւնը ընդունելու Աւագ Իմամը ու զայն առաջնորդելու ֆրանչիսկոս Պապին, պաշտօնական այցելութեան մը ծիրէն ներս։