Milicët islamistë të lidhur me grupin xhihadist Jabhat al Nusra nisën dje një sulm me goditje mortaje mbi qytetin sirian me shumicë të krishterë Sqelbiya, në provincën qendrore të Hama-s, duke shkaktuar vdekjen e tre civilëve. Njoftimin e japin burimet kurde, rimarrë nga agjencia Fides. Viktimave u duhen shtuar edhe pesëmbëdhjetë të plagosur, disa prej të cilëve, në gjendje të rëndë. Sulmi, me breshëri të dendura mortaje, i dëmtoi rëndë lagjet qendrore. Qyteti, nën kontrollin e ushtrisë qeveritare, është sulmuar edhe në të kaluarën nga milicitë xhihadiste, që kanë provuar disa herë ta pushtojnë, por pa e arritur asnjë herë qëllimin.
Në Hassakè vijon armëpushimi ndërmjet ushtrisë qeveritare e milicëve
Ndërkaq në provincën siriane veri-lindore të Hassaké vijon armëpushimi ndërmjet ushtrisë qeveritare dhe milicëve kurdë të Bashkimit të mbrojtjes popullore (Ypg) vendosur të shtunën e kaluar, pas ndeshjes së përgjakshme të së mërkurës, 20 prill, posaçërisht në qytetin Qamishli. Përfaqësuesit e milicive kurde, të pyetur nga agjencia Ara News, ripohuan se duan t’i mbajnë nën kontroll zonat e pushtuara gjatë ndeshjes e se nuk e kanë në mendje t’i bëjnë asnjë lëshim Assad-it. Sipas krerëve kurdë, regjimi i Assad-it i ka detyruar popullsitë civile vendase të krijojnë grupet paraushtarake “të vetëmbrojtjes”, që i nënshtrohen ushtrisë qeveritare, duke përdorur, posaçërisht mbi punojnjësit publikë, forma kërcënimi, si prerja e rrogës, ose pushimi nga puna.
Pas tragjedisë siriane, fshihen strategji dhe interesa të ndërlikuara
Hapja e një fronti të ri konflikti ndërmjet milicive kurde dhe ushtrisë së Assadit në Sirinë veri-lindore, tregon se pas tragjedisë siriane fshihen strategji e interesa të ndërlikuara, që nuk mund të shikohen thjesht si ndeshje me xhihadistët e Shtetit të vetëshpallur Islamik (Daesh). Sipas burimeve vendase, gjatë ndeshjeve triditore ndërmjet milicëve kurdë dhe ushtrisë qeveritare, vdiqën 17 civilë, 10 milicë kurdë si dhe 31 ushtarë qeveritarë e paraushtarakë, të lidhur me regjimin.
All the contents on this site are copyrighted ©. |