Մահաբեր երկրաշարժ մը հարուածեց Էքուատորը։

(Ռատիօ Վատիկան) ֆրանչիսկոս Պապը ի լուր Էքուատորի  մէջ պատահած մահաբեր երկրաշարժին իր մօտիկութիւնը յայտնեց Էքուատորի ժողովուրդին, իր ցաւակցութիւնը փոխանցելով երկրաշարժի զոհերուն ու իր աղօթքը բարձրացնելով Ողորմութեան Աստուծոյ։

Երկրաշարժը (7,8 աստիճան) հարուածեց երկրի 6 մարզեր, որուն հետեւանքով զոհերու թիւը ցայժմ հասած է 272-ի, իսկ վիրաւորներունը` շուրջ 3000։

Երկրին նախագահը Ռաֆայէլ Գորէա, որ  վերջին օրերուն  այցելութիւն կատարած էր Վատիկան, որակած է եղելութիւնը որպէս ահաւոր ողբերգութիւն մը։

''Տասնեակ հազարաւոր մարդիկ  տուներէն դուրս են'' յայտնած է Գոմպոնեան հայր Կոնզալէս Ռաֆայէլ։

Բանակէն 10 հազար ոստիկաններ օգնութեան հասած են հրաւիրելով բնակիչները հանդարտութեան ու անդորրութեան։

Հայր Կոնզալէն դիտել տուաւ որ Էքուատորի ժողովուրդը միշտ եղած է զօրավիգ եւ ուրիշին օգնութեան հասնող, այս ոգին յոյժ կարեւոր է այս պահուս։ Պետութիւնը իր կարգին կը սպասէ միջազգային շտապ օգնութեան։

Հայր Կոնզալէս շնորհակալութիւն յայտնած է հուսկ ֆրանչիսկոս Պապին, որ կիրակի օրը` Ուրախ Լեր  աղօթքին ընթացքին յիշեց Էքուատորը, ինչպէս նաեւ Ճափոնը, որ իր կարգին մի քանի օր առաջ, զոհ եղած է այլ երկրաշարժի մը։ Ամէնքս մեր աղօթքը կը բարձրացնենք Ողորմութեան Աստուծոյ, մասնաւորապէս  բոլոր անոնց որոնք իրենց տունը կորսնցուցին ու մտահոգութեան մէջ կ՛ապրին ըսաւ Հայր Կոնզալէս։