(Ռատիօ Վատիկան) Շաբաթ, 16 ապրիլ 2016-ին, Լեզւոս կղզի թռիչքի ընթացքին, Ֆրանչիսկոս Պապ շնորհաւորական պատգամ յղեց Պենետիկտոս ԺԶ Վաստակաւոր Քահանայապետին, որ այսօր կը նշէ իր ծննդեան 89 ամեակը։ Պատգամին մէջ Սրբազան Հայրը Վաստակաւոր Քահանայապետին յայտնած է իր եւ Իրեն ընկերացող բոլոր պատուիրակութեան անդամներուն ու լրագրողներուն լաւագոյն մաղթանքները խնդրելով Տիրոջմէ որ շարունակէ օրհնել Անոր մատուցած թանկագին մօտիկութեան ծառայութիւնը եւ աղօթքը՝ համայն եկեղեցւոյ համար ։
Նշենք թէ Վաստակաւոր Քահանայապետ` Պենետիկոս ԺԶ, ծննդեան իր 89-րդ տարեդարձին առթիւ` 16 ապրիլ 2016-ին, Վատիկանի մէջ նախատեսուած է համերգ մը, կատարողութեամբ` Իտալական Franciacorta նուագախումբին, որ պիտի նուագէ Wolfgang Amadeus Mozart-էն եւ Joseph Haydn-էն կտորներ։ Տօնախմբութեան ներկայ պիտի գտնուի նաեւ Պենետիկոս ԺԶ-ի 89 տարեկան վարդապետ եղբայրը։
Նշենք թէ 2010-ին Պենետիկտոս ԺԶ Պապը իրեն ի պատիւ կազմակերպուած համերգին աւարտին, քահանայապետական Քասթել-Կանտոլֆօ ամարանոցին մէջ, յայտնած է՝ որ անսալով Mozart-ը, իր սրտին մէջ կը զգար ներկայութիւնը Երկինքի գեղեցկութեան մէկ շողին։
All the contents on this site are copyrighted ©. |