Siri: në Sadad kthehen të krishterët e shpërngulur në Evropë

Në qytetin sirian të Sadadit kthehen familjet e para të krishtera, që u shpërngulën në Evropë për të ikur nga dhuna e konflikti në vijim. Lajmin e jep për mediat ruse, kryebashkiaku Suleiman al Khalil. “Të krishterët, që u larguan nga Siria për në Evropë po fillojnë të kthehen në Sadad dhe në qytete të tjera”, pohon Khalil, duke shtuar se kthimi është rezultat e suksesit të operacioneve ushtarake me mbështetjen e Rusisë dhe i armëpushimit, për të cilin u morën vesh palët në Mynih të Gjermanisë, më 12 shkurt.

Në Sadad janë kryer masakra. Ka varre të përbashkëta

Para konfliktit, Sadadi kishte rreth 12 mijë banorë, pjesa më e madhe e të cilëve ishin të krishterë asirë dhe siro-ortodoksë. Gjatë viteve të luftës, së paku njëmijë vetë ikën jashtë Sirisë, përfshirë kryepeshkopin Selwanos Boutros Alnemeh, mitropolit siro-ortodoks i Homsit dhe i Hama-s. Sipas burimeve kishtare lokale, në tetor 2003, gjatë pushtimit të përkohshëm të qytetit nga ana e xhihadistëve të al Nusrës, janë kryer masakra kundër popullsisë civile, konfirmuar nga gjetja e një varri të përbashkët me së paku 30 kufoma. Nëntorin e kaluar, edhe xhihadistët e të ashtuquajturit Shtet Islamik (Daesh) provuan ta merrnin sërish në dorë qytetin, duke sulmuar postoblloqet e ushtrisë siriane.

Kthimi i të krishterëve

Gjatë tre muajve të fundit, sipas kryebashkiakut, së paku njëqind të krishterë janë kthyer në shtëpitë e tyre në Sadad dhe pritet të vijnë edhe dyqind të tjerë. Qyteti ndodhet 14 km larg nga rruga që bashkon Damaskun me Homsin dhe në të ndodhen 15 kisha.