Կարդինալ Վելիօ. ''Գաղթականները վաճառքի ապրանք չեն։
(Ռատիօ Վատիկան) Եւրոպայի միութեան ու թուրքիոյ միջեւ համաձայնագիրը որ կը սահմանափակէ գաղթականներու մուտքը Եւրոպա ի զօրու դարձած է։ 135 գաղթականներ Յունաստանէն Թուրքիա փոխադրուեցան և անոնց տեղ նոյնքան սուրիացի գաղթականներ Գերմանիա ու Ֆինլանտիա ուղարկուեցան։ Ոչ-կառավարական բազմաթիւ միջազգային կազմակերպութիւններ բողոքեցին վերոյիշեալ համաձայնագիրի դէմ, որակելով զայն որպէս լոկ հաւաքական վտարում և որուն միակ շահաւորն է Թուրքիան` քաղաքական ու տնտեսական գետնի վրայ։
Գաղթականներու քահանայապետական խորհուրդի նախագահը` կարդինալ Անթոնիօ Մարիա Վելիօ, իր կարգին վերապահութիւնը ու տարակոյս յայտնած է վերոյիշեալ համաձայնագրին նկատմամբ, ընդգծելով թէ այս կարգադրութեամբ կը մերժուի գաղթելու իրաւունքը։
Ամէնքս գիտենք թէ ինչպէս է Թուրքիան, ան բնաւ չէ եղած ազատութեան ու հանրավարութեան օրինակ։ Թուրքիան ամէն բան կը կատարէ անդամ դառնալու եւրոպական միութեան։ Գաղթականը չի կրնար դառնալ ապրանք-վաճառք մը, ի շահ այդ կամ այն երկրին - ըսած է Կարդինալ Վելիօ։
Թուրքիան ամէն օր դէպի Սուրիա խումբեր կը ճամբէ։ Ո՞վ է հսկողը Թուրքիոյ վրայ։ Այս խեղճ ու անպաշտպան գաղթականը, որ կ՝աշխատի իր ընտանիքին միանալ, դարձեալ ու պարտադրաբար ինքզինք կը գտնէ իր հայրենիքին մէջ։ Միթ՞է գաղթականը ծրար մըն է որ կարելի է ''փոսթայի'' միջոցաւ ետ վերադարձնել, հարց տուած է Կարդինալ Վելիօ հաստատելով թէ գաղթականը անհատ մըն է, եւ ոչ թէ ապրանք։
Գաղթականներու եւ Փախստականներու Քահանայապետական խորհուրդի նախագահը ապա յայտնած է թէ ''որպէս պետութիւն պէտք ենք մարդկային մօտեցում ցոյց տալ։ Եւրոպան պարտական է զանազանել գաղթականի ու փախստականի միջեւ տարբերութիւնը։ Գոյութիւն ունի միջազգային համաձայնութիւն մը, ստորագրուած բարգաւաճ երկիրներէն որ կ՛ երաշխաւորէ փախստականին կարելիութիւնը ապրելու իր հայրենիքէն դուրս։ Մինչ ընկերային գաղթականին կարելի է խրատել` ետ տուն վերադարձ, քանի հոս գործ չկայ։ Նոյն տրամաբանութիւնը կարելի չէ գործածել փախստականին հետ որուն միջազգային հասարակութիւնը պարտական է օգնութիւն նուիրել ու անոր պատշաճ կեանքի մը կարելիութիւնը շնորհել։
| All the contents on this site are copyrighted ©. |