Աւագ Հինգշաբթի «Գիտէ՞ք ինչ ըրի ձեզի» (Յովհաննէս 13,12)։

Աւագ  Հինգշաբթին  Յիսուսի  կեանքին  ամէնէն  բազմադէպ  եւ բազմաբովանդակ օրն էր: Ահաւասիկ  այն  օրուան  ընթացքին  պատահած  կարեւորագոյն դէպքերուն ցանկը.

-Յիսուս  լուաց  առաքեալներուն  ոտքերը  եւ  պատգամեց,  որ  իրենք  եւս լուան իրարու ոտքերը:

-Հաստատեց Սուրբ Հաղորդութեան Խորհուրդը:

-Հաստատեց Քահանայութեան Խորհուրդը:

-Բացայայտեց Դաւաճանին ինքնութիւնը:

-Վեր  հանեց  Պետրոսին  մասնայատուկ  դերը՝  իր  եղբայրները  «սրտապնդելու» (Ղուկաս 22, 32):

-Անցուց Ճգնաժամային պահեր Գեթսեմանիի պարտէզին մէջ:

-Ձերբակալուեցաւ:

-Ենթարկուեցաւ  ծաղրուծանակ  եւ  անարգական  դատավարութեան  մը,  հրէական Ժողովարանէն ներս:

-Եւ  բանտարկուեցաւ՝  սպասելով  յաջորդ  օրուայ  մահուան դատավճիռին:

Աւելցնելու  է,  որ  Աւագ  Հինգշաբթի  օրը,  Յիսուս  մեզի  տուաւ  նոր ուսուցում մը`

-Իրար սիրելու նոր պատուիրանը:

-Մեզ իր բարեկամները կոչեց:

-Խոստացաւ  առաքել  Սուրբ  Հոգին,  որպէսզի  մեզի  օգնէ  գործադրելու  իր պատուիրանները:

-Եւ աղօթեց որպէսզի մէկ ըլլանք:

Այն  իչն  որ  Յիսուս  ըսաւ  եւ  ըրաւ՝  սերտօրէն  առնչուած  էր  Եկեղեցին հիմնելու  իր  ծրագիրին  հետ:  Կ'ուզէր  իր  ժողովուրդը  ընդմիշտ  կենսագործել Սուրբ Հաղորդութեամբ, Քահանայական ծառայութեամբ, միութեամբ եւ սիրով:

Ապահովաբար,  Աւագ  Հինգշաբթին  դառնանուշ  օր  մըն  էր  Յիսուսի համար:  Արդարեւ,  ցաւատենչ  ու  սիրատենչ  իրողութիւններու  օրն  էր միանգամայն:  Յիսուս  մեզ  սիրեց  «ծայր  աստիճան» (Յովհաննէս  13, 1):  Իսկ,  իր կամաւոր  չարչարանքով,  մեզի  բացաւ  երկինքի  դուռը:   Ուստի,  մտաբերենք պատահածը:  Օրն  անցընենք  խոկալով  մեր  Փրկչին  ըսածներուն  եւ  ըրածներուն վրայ,  զանոնք  մեր  սրտին  մէջ  պահենք,  անոնց  վրայ  խորհրդածենք,  ապա զանոնք  հռչակենք՝  ի  խնդիր  մեր  ընտանիքի  պարագաներուն  եւ  մեր  շրջանակի բարիքին:

Հայր Գէորգ. Վրդ. Զապարեան