Ս. Աթոռի Պետական Քարտուղարին այցելութիւնը Մակեդոնիա և Պուլկարիա

(Ռատիօ Վատիկան) Կարդինալ Փիեթրօ Փարոլին՝ Ս. Աթոռի Պետական Քարտուղարը, 18-22 Մարտ  2016­, պաշտօնական այցելութեամբ կը մեկնի Մակեդոնիա և Պուլկարիա տեղական իշխանութեանց ու կաթողիկէ Պալքան  երկու եկեղեցիներու հրաւէրով։

Կարդինալը նախ Skopje՝ Մակեդոնիայի մայրաքաղաքը պիտի այցելէ, ուր հանդիպումներ պիտի ունենայ երկրի աւագ իշխանութիւններուն հետ, իսկ երեկոյեան ժամը 6-ին պատարագ պիտի մատուցէ Յիսուսի ս. Սրտի աթոռանիստ եկեղեցւոյ մէջ, որուն աւարտին ներկայացումը պիտի կատարուի ֆրանչիսկոս Պապին ''Աստուծոյ անունը ողորմութիւն է'' վերտառութեամբ գիրքին։ Պետական Քարտուղարը ապա բացումը պիտի կատարէ նոր առաջնորդարանին եւ հանդիպում պիտի ունենայ մայրաքաղաքի կղերին հետ։ Հուսկ այցելութիւն պիտի կատարէ Մակեդոնիայի բիւզանդական կաթողիկէ ''Strumica'' թեմին։

20 Մարտին կարդինալ Փարոլին Պուլկարիա կը հասնի, ուր Սոֆիա մայրաքաղաքին մէջ բացումը պիտի կատարէ ''ննջման'' եկեղեցւոյ։ Յետմիջօրէին կարդինալ Փարոլին պիտի այցելէ Սոֆիայի բիւզանդական եկեղեցին, որ նուիրուած է Յովհաննէս 23-րդ սուրբ Պապին։ Նշենք որ Յովհաննէս 23-րդ սուրբ Պապ եղած է Պուլկարիոյ առաքելական նուիրակ։

Կիրակի 20 Մարտի երեկոյեան կարդինալ Փարոլին պատարագ պիտի մատուցէ ապա աւարտին հանդիպում պիտի ունենայ Պուլկարիոյ կղերին հետ։ 21 Մարտին Վաճիկանի թիւ մէկ դիւանագէտը  հանդիպում պիտի ունենայ Պուլկարիոյ Պատրիարք գերերջանիկ Նէոֆիդի ու եկեղեցւոյ սիւնհոդոսի կարգ մը անդամներուն հետ։ Նոյնպէս կարդինալ Փարոլին տեսակցութիւն պիտի ունենայ երկրի հանրապետութեան նախագահ ''Rossen Plevneliev''-ի, վարչապետ ''Boyko Borissov''-ի ու Աւագ մուֆթի ''Mustafa Hadzi''ի հետ։