Երանելի Մայր Թերեզայի սրբադասման արարողութիւնը պիտի կատարուի 4 սեպտեմբեր 2016-ին։
(Ռատիօ Վատիկան) Երեքշաբթի, 15 մարտի առաւօտեան, Վատիկանի մէջ տեղի ունեցաւ Սուրբերու դատի հայող կարդինալական ժողովը գլխաւորութեամբ Ֆրանչիսկոս Սրբազան Քահանայապետին։
Ժողովին ընթացքին Ֆրանչիկոս Պապ ստորագրեց 5 երանելիներու սրբադասման եւ սրբադասման արարողութեան թուականը ճշդող վաւերաթուղթը , որուն մէջ կը հաստատուի թէ երանելի Մայր Թերեզայի սրբադասման արարողութիւնը տեղի պիտի ունենայ յառաջիկայ 4 սեպտեմբեր 2016-ին։
Իսկ՝ 5 յունիս 2016-ին, տեղի պիտի ունենայ երանելի Հայր Սթանիսլաւօ Տի Ժէզու Մարիա եւ երանելի Մարիա Էլիզապեթթա Հեսելպալտի սրբադասման արարողութիւնը։
Ապա ՝Կիրակի 16 հոկտեմբեր 2016-ին, Սուրբերու դասին պիտի արժանան երանելի Ժուզեփփէ Սանչեզ Տել Ռիօ, որ վաղ հասակին՝ 14 տարեկանին նահատակուած է մեքսիոյի մէջ` 1929-ին ինչպէս նաեւ Արժանթինցի Խօսէ Կապրիել Տել Ռոզարիօ Պրոքերոն։
Ահաւասիկ 5 նոր Սուրբերու հակիրճ կենսագրականը
Երանելի Պրոքերօ
Խօսէ Կապրիել Տել Ռոզարիօ Պրոքերօ, ծնած է Արաժանթինի մէջ 16 մարտ 1840-ին։ Ան քահանայ ձեռնադրուած էր 1866-ին, եւ ժողովրդապետ նշանակուած է գիւղի մը մէջ ուր բարելաւած է հաւատացեալներու թէ նիւթական թէ հոգեւոր վիճակը։ Ան բաժնելից դարձած է հաւատացեալներու առօրեայ կեանքին մինչեւ այն աստիճան որ օրին մէկը վարակուած է ծանր հիւանդութենէն մը՝ հաւատացեալի մը գաւաթէն ՝՝Մաթէ՝՝ ըմպելին խմելով։ Վախճանած է Villa del Tránsito իր ծննդավայրին մէջ՝ 26 յունուար 1914-ին։Աստուծոյ ծառայ հռչակուած է 2004-ին՝ Սուրբ Յովհաննէս Պօղոս Բ Քահանայապետին օրով, ապա երանելիներու դասին արժանացած է 2013-ին՝ Ֆրանչիսկոս Պապի կողմէ։ Անցեալ 22 յունուարին, Ֆրանչիսկոս Պապ արտօնութիւն շնորհեց Սուրբերու դատի ժողովին հրապարակելու Երանելի Պրոքերոյի բարեխօսութեամբ կատարուած հրաշքի վաւերաթուղթը։ Հրաշքը կը հայի 9 տարեկան մանուկի մը որ 45 օրեր մահաքունի մէջ մնալէն վերջ արթնցած է Երանելիին բարեխօսութեամբ։ Խօսէ Կապրիել Տել Ռոզարիօ Պրոքերոյի աճիւնները կը հանգչին իրեն անուան նուիրուած Վիլլա Քուրա Պրոքերու ծննդավայրին մէջ։
2013-ին՝ Պրոքերոյի երանացման արարողութեան առթիւ , Ֆրանչիկսոս Պապ Արժանթինի եպիսկոպոսաց դասին ուղղարկած նամակին մէջ երանելի Պրոքերոն նմանեցուցած է հովիւի մը որ իր վրան ունի ոչխարներուն հոտը։
Երանելի Սանչեզ Տել Ռիօ։
Խոսէ Սանչեզ Տել Ռիօ ծնած է 28 մարտ 1913-ին։ Ան Մեքսիքոյի մէջ եղած է քրիստոնեայ տիպար երիտասարդ մը եւ սպաննուած է կառավարական մարդու մը կողմէ իր Քրիստոնեայ հաւատքին կառչած մնալուն եւ չ՝ուրանալուն համար՝ 10 փետրուար 1928-ին։ Խօսէ Սանչեզ երանելի հռչակուած է Պենետիկրոս ԺԶ վաստակաւոր քահանայապետի օրով ՝ 20 նոյեմբեր 2005-ին։
Երանելի Սթանիսլաւ Տի Ժեզու Մարիա
Երանելի Սթանիսլաւ Տի Ժեզու Մարիա, ծնած է Լեհաստան ՝18 մայիս 1631-ին։ Եղած է քահանայ եւ Լեհաստանի մէջ պայքարած է անարդարութեան դէմ։ Պենետիկտոս ԺԶ Քահանայապետութեան շրջանին ՝16 սեպտեմբեր 2007-ին, Աստուծոյ ծառայ Սթանիսլաւ հռչակուեցաւ երանելի։
Երանելի Մարիա Էլիզապեթթա Հեսսելպլատ։
Երանելի Մարիա Էլիզապեթթա Հեսսելպլատ։ Ծնած է Հռոմի մէջ 1870-ին եւ վախճանած է 1957-ին։ Հիմնած Է Սրբուհի Պրիժիտայի անուան միաբանութիւնը։
Երանելի Մայր Թերեզան
Մայր Թերեզա կը նկատուի աշխարհի ամենահեղինակաւոր կիներէն: Անոր կեանքն ու գործունէութիւնը մեծ հետք ձգած են մարդկութեան պատմութեան վրայ: «Արմատներով եւ արիւնով ալպանացի եմ: Քաղաքացիութեամբ՝ հնդիկ: Կաթողիկէ միանձնուհի եմ: Կոչումով՝ համայն աշխարհին կը պատկանիմ: Սրտով կը պատկանիմ Յիսուսի սրտին»:
Մայր Թերեզայի հիմնած միաբանութիւնը կը գործէ աւելի քան 120 երկիրներու մէջ, ներառեալ Հայաստանը` ուր միաբանութիւնը հաստատուեցաւ 1988-ի Մեծ երկրաշարժէն ետք։
Մայր Թերեզան ծնած է 26 օգոստոս 1910-ի եւ հոգին աւանդած է 5 սեպտեմբեր 1997-ին։
| All the contents on this site are copyrighted ©. |