26 лютага 2016 г. папа Францішак прыняў на аўдыенцыі ўдзельнікаў міжнароднай канферэнцыі прысвечанай дзесяцігоддзю энцыклікі Бэнэдыкта XVI “Deus caritas est” (Бог ёсць любоў), якая па ініцыятыве Папскай рады “Cor Unum” праходзіць у Ватыкане.
Гісторыя Касцёла – гэта гісторыя любові, якая была атрымана ад Бога і якая павінны быць прынесена ў свет, сказаў Святы Айцец. Юбілейны Год Божай Міласэрнасці, паводле яго слоў, з’яўляецца нагодай для таго, каб вярнуцца да гэтага “пульсуючага сэрца ў нашым жыцці і нашым сведчанні”, да цэнтра прапаведвання веры: таго, што “Бог – гэта любоў”.
“Бог не проста мае жаданне і здольнасць любіць; Бог – гэта любоў: любоў – Яго сутнасць, прырода. Ён – адзіны, але не адасоблены; Ён не можа знаходзіцца ў адзіноце, не можа закрывацца ў самім сабе, таму што з’яўляецца еднасцю, любоўю, а любоў, па сваёй прыродзе, перадаецца, распаўсюджваецца”, - сказаў Святы Айцец.
Паводле слоў Папы, кульмінацыяй выйсця Бога да людзей, стала ўцелаўленне Яго Сына, што з’яўляецца праявай сапраўднай міласэрнасці. “Любоў і міласэрнасць вельмі злучаны, бо з’яўляюцца спосабам быцця і дзейнасці Бога: Яго ідэнтычнасцю і Яго іменем”, - падкрэсліў Францішак.
Таксама і кожны ўчынак любові, салідарнасці і дзялення, які здзейсняецца ў Касцёле, з’яўляецца адлюстраваннем любові Бога. “Ён, ніколі не стамляючыся, вылівае сваю любоў на нас і мы пакліканы станавіцца сведкамі гэтай любові ў свеце”, - перакананы Святы Айцец. Папа заклікаў углядацца ў Божую любоў, як у компас, які дае напрамак жыццю, дзейнасці, адносінам да братоў і свету.
Любоў, паводле слоў Францішка, павінна ўсё больш адлюстроўвацца ў жыцці Касцёла. “Як бы я хацеў, каб кожны ў Касцёле, каб кожная структура, кожная ініцыятыва паказвала, што Бог любіць чалавека! Місія, якую нашы дабрачынныя структуры выконваюць – важная, бо набліжаюць мноства бедных людзей да больш годнага і чалавечага жыцця, што як ніколі неабходна; але гэта місія яшчэ важнейшая таму што, не на словах, але з канкрэтнай любоўю дазваляе адчуць кожнаму чалавеку, што ён любімы Айцом, што з’яўляецца Яго дзіцём, якому вызначана вечнае жыццё з Богам”, - сказаў Папа.
All the contents on this site are copyrighted ©. |