Патрыярх Кірыл: уз’яднанне Цэркваў было б Божым цудам

Уз’яднанне Рускай Праваслаўнай Царквы з Рыма-Каталіцкім Касцёлам было б Божым цудам, калі б мы калі-небудзь да яго дажылі, заявіў Патрыярх Маскоўскі і ўсяе Русі Кірыл, у размове з журналістамі пасля свайго падарожжа па краінах Лацінскай Амерыкі і ў Антарктыку. Прадстаяцель падкрэсліў, што “Царкве немагчыма зблізіцца, нават не тое, што аб’яднацца, дамоўленасцю паміж дзвюма лідэрамі”. “Пайду далей: Цэрквы нельга аб’яднаць нават дамоўленасцю ўсёй іерархіі”, сказаў ён, маючы на ўвазе іерархію, як праваслаўную, так і каталіцкую.

Патрыярх Маскоўскі нагадаў, што падчас яго сустрэчы з папам Францішкам не абмяркоўваліся тэалагічныя пытанні, рознагалоссі па якіх захоўваюцца. “Мы сумленна кажам аб падзеле. Мы застаемся на тых пазіцыях, на якіх былі нашы айцы”, - прыводзіць словы Патрыярха агенцтва “РИА Новости”.

Прадстаяцель Рускай Праваслаўнай Царквы таксама распавёў, што аб падрыхтоўцы яго сустрэчы з папам Францішка ведала вельмі вузкае кола людзей. “Мяне ніхто не адгаворваў ад сустрэчы, таму што не ведаў. Аб гэтай сустрэчы ведалі пяць чалавек”, сказаў ён.