Նախկին վարչապետ Սաատ Հարիրի երէկ առաւօտեան այցելեց Պքերքէ, ուր հանդիպում մը ունեցաւ մարոնի համայնքի Պշարա Ռայի պատրիարքին հետ:
Հանդիպումէն ետք Հարիրի յայտնեց, որ Ռայի պատրիարքին հետ ինք մնայուն խորհրդակցութեան մէջ է` աւելցնելով, որ ինք Պքերքէ այցելած է իրազեկ դառնալու համար Ռայի պատրիարքին տեսակէտներուն:
Հարիրի շեշտեց, որ նախագահական ընտրութեան առումով կան երեք հիմնական թեկնածուներ, որոնցմէ մէկը պէտք է նախագահ ընտրել:
«Երեսփոխաններուն պարտականութիւնն է նախագահական ընտրութիւն կատարել, իսկ մենք պիտի շնորհաւորենք ընտրուող թեկնածուն: Ոմանք կը նկատեն, թէ նախագահական ընտրութեան մասնակցութիւնը պոյքոթի ենթարկելը իրաւունք է, սակայն այսքան երկար ժամանակի համար ընտրական նիստերը պոյքոթի ենթարկելն ու նախագահական աթոռը թափուր պահելը սահմանադրութեան դաւաճանութիւն է», ըսաւ Հարիրի` շեշտելով, որ հանրապետութեան նախագահի ընտրութիւնը պայման է:
Պքերքէի մէջ Հարիրի շեշտեց, որ իրենք կառչած կը մնան Մարատա հոսանքի ղեկավար, երեսփոխան Սլէյման Ֆրենժիէի թեկնածութեան:
All the contents on this site are copyrighted ©. |