Papa Bergoglio, i pari ipeshkëv i Romës, i lindur në Amerikën Latine, mundi, më në fund, ta shikojë sy për në sy Zojën e Gudalupes, që është në zanafillë të identietetit të popujve latinoamerikanë. E pa sy për sy, Nënën e njerëzve të shpërngulur, të padëshiruar, të flakur në skajet e skutat e jetës. Njerëzit më të dashur për Françeskun, që u lut, fill i vetëm, në heshtje, në Camarin, vend ku ruhet figurja e Zojës, ku mund t’ia ngulte gjatë sytë fytyrës misterioze të Pajtores e Mbretëreshës së Amerikave e ku ndodhet edhe kurora prej ari e argjendi, që ia solli si dhuratë. E, në sa lutej, dëgjoi një zë, që i pëshpëriste në shpirt:
“A nuk jam Nëna jote? Thua nuk jam këtu? Mos lejo që të të mposhtin dhimbjet tua, trishtimet tua! Jam këtu! Këtu më gjen, kur të kesh nevojë, kur të jesh i trishtuar, kur e ndjen se po të lëshon zemra.... E edhe kur zemra jote galdon në Zotin”.
E Papa iu përgjigj me Himnin e lashtë:
“S’due tjetër, veç me të pa,
Mari!
Me sy të hapun kah ti,
si botë e mbyllun në vetvete...
Mjafton Ty me të kundrue
e me zbrazë heshtas
në zemrën tande,
zemrën e mbushun plot.
E Ti flladin e ballit
aspak mos e trazo.
Vetëm përkunde lehtë
vetminë time të dhunueme,
varun mes jetës e vdekjes...
Në sytë e tu,
o Nanë e dashunueme,
shoh një copë jete
shtangun në kujtesë;
e orët, shoh, që nxitojnë,
e njerëzit që i kafshon
ndysia e jetës e e vdekjes...
Mjafton me të pa, o Nanë,
me t’kundrue veç një çast
me zemër në zemrën tande,
në pastrinë tande
të bardhë porsi zambaku,
e me pa Dritën
që rri pezull mbi ne!1
1 Përkthim i lirë
All the contents on this site are copyrighted ©. |