10 biçikleta elektrike për Françeskun. Fiati papnor, në ankand

Papës Françesku iu dhuruan sot 10 biçikleta elektrike nga një ndërmarrje “green” toskane, në Itali. Prej kohësh, drejtuesit e Nwg të Pratos, siç quhet ndërmarrja që punon prej kohësh në fushën e energjive të rinovueshme, vendosën t’i bënin këtë dhuratë Atit të Shenjtë, në shenjë mirënjohjeje për enciklikën e tij “të gjelbërt” “Lëvduar qofsh”.

         Themeluesit e Nwg-së shpjeguan në një konferencë për shtyp në Vatikan se enciklika është pritur me gëzim të madh e është burim frymëzimi për personelin, bashkëpunëtorët dhe agjentët tregtarë. Në vitin 2012, po kjo ndërmarrje i pati dhuruar Papës Ratzinger një makinë të vogël elektrike, që edhe sot përdoret nga personeli i Sallës së Shtypit të Vatikanit. Edhe njëra nga biçikletat, që iu dhuruan Atit të Shenjtë, është e destinuar të përdoret nga ky personel.

Të tjerat nuk dihet se ku do të përfundojnë, por njihet prirja e Papës Françesku për t’i përdorur gjërat, që i dhurojnë, për bamirësi. Ky do të jetë, për shembull, fati i njërës prej makinave Fiat 500, përdorur nga Ati i Shenjtë gjatë udhëtimit në SHBA-të. Ajo do të shitet në ankand më 29 janar, me rastin e ekspozitës së makinave në Filadelfia. Çmimi fillestar i automobilit, ndërtuar enkas për Papën, është 30 mijë dollarë, por natyrisht, nuk dihet se ku do të mbërrijë oferta përfundimtare. Gjithsesi, shuma do të shkojë për bamirësi.