2016-01-15 09:43:00

ՀՀ կառավարութեան յատկացուցած տարածքը մշակութային կեդրոն պիտի դառնայ


Սաղմոսավանքի հարեւանութեամբ, Քասախի ձորին կողքը գտնուող հողատարածքը, որ նախօրէին կառավարութեան որոշումով տրամադրուած է Հայ առաքելական եկեղեցիին, պիտի օգտագործուի մշակութային, հասարակական, կրթական կեդրոն կառուցելու համար: Այս մասին, ըստ News.am-ի, վստահեցուցած է Մայր Աթոռի մամլոյ դիւանի պատասխանատու տէր Վահրամ քահանայ Մելիքեանը:

«Արագածոտնի թեմն է նման նախաձեռնութեամբ հանդէս եկել: Վանքի յարակից տարածքում կառուցուելու է մշակութային, սոցիալական, կրթական կենտրոն: Լինելու է այնպիսի կենտրոն, ինչպիսին «Հայորդաց տուն»ն է»,- ըսած է տէր Վահրամը:

Անդրադառնալով կառոյցի նիւթական բաժինին՝ տէր Վահրամ քահանայ Մելիքեան նշած է, որ արդէն կան բարերարներ, որոնք պատրաստակամութիւն յայտնած են` կեդրոնի կառուցման աջակցելու համար:

Նշենք, որ կառավարութիւնը Յունուար 14-ի նիստին Մայր Աթոռ Սուրբ Էջմիածինին սեփականութեան իրաւունքով անհատոյց յատկացուց 0,4 հա հողամաս: Խօսքը Արագածոտնի մարզի Սաղմոսաւան համայնքին մէջ գտնուող 0.508 հա պետական սեփականութիւն հանդիսացող բնակավայրերու նպատակային նշանակութեան հողամասին մէկ մասը յատկացնելու մասին է: Ըստ որոշման, նշուած տարածքը չ՝օգտագործուիր, դատարկ է, համայնքը մշակոյթի կեդրոն չունի, եւ Հայաստանեաց Առաքելական Սուրբ Եկեղեցին պատրաստակամութիւն յայտնած է ՀՀ Արագածոտնի մարզի Սաղմոսաւան համայնքի վարչական սահմաններուն մէջ գտնուող պետական սեփականութիւն հանդիսացող բնակավայրերու հասարակական կառուցապատման 0.508 հա հողամասէն 0.4 հա տարածքը եկեղեցիին յանձնելով կառուցել մշակոյթի կեդրոն:








All the contents on this site are copyrighted ©.